ORANJESTAD (AAN): E ta un dia special pa e conocido ex-locutor y musico, Landho Garcia. Awe Diasabra 23 di April 2022, e ta cumpli exactamente 28 aña cu e ta clean.
“Mi ta un milagro, y mi tin di duna testimonio,” ta loke Garcia a declara na DIARIO e siman aki.
El a splica tambe, cu e ta bay tin un serie di TV, den formato di documentario di 3 programa di 1 ora cada uno. Den e documentario aki, e lo bay duna su testimonio desde cu el a dal e prome stick di marihuana na 1968, te na e ultimo paranda di cocaina na 1993.
E lo bay relata na pueblo haya sa, tur loke el a haci pa mantene su mes limpi di drogadiccion.
“Keremi, cu ora bo ta bao dominio di Droga, ta tur loke ta malo bo ta desea. Y tur loke ta bon, bo ta rechaza, cuminzando cu bo casa y bo yiunan,” Landho Garcia a indica.
El a bisa cu el a bay di un bida ganando 7.000 Florin pa luna, y mañan e ta cobra onderstand di 800 Florin. Esey ta droga!
DIARIO ta felicita Landho Garcia cu su dedicacion y perseverancia pa mantene su alma y curpa sano, y e ta splica cu keto bay su meta ta pa sigui e pasonan di Hesus Cristo, y tur dia e ta haci oracion na rudia. Pabien Landho, sigui asina.
