Un Deporte cu ta fungi como un Lenguahe Universal
ORANJESTAD (AAN) Desde aña 1924, riba e fecha 25 di mei ta conmemora e “Dia Mundial di Futbol”, cu ta kizas, e Deporte di mas stima y popular na e gran mayoria di paisnan, na tur continente, traspasando tur frontera.
Futbol ta fungi como un lenguahe universal cu ta trascende frontera y ta uni e humanidad di punta pa punta di mundo, for di e pais di mas chikito te esun di mas grandi, no ta haci diferencia cu condicion social, ni situacion economico, ni sikiera cu salud di hende, ya cu, por ehemplo, durante e Copanan Mundial, di un manera of otro, semper lo tin un pantaya den un sala di hospital, cu por ta accesible na pashentnan cu ta stima e deporte aki.
ONU, via su resolucion “A-RES-78281” a declara 25 di mei como Dia Mundial di Futbol na 1924, pero a wordo aproba oficialmente, te dia 7 di Mei 2024, pues apenas dos aña pasa.
Esaki cu e obhetivo di rindi homenahe na e centenario di e prome Copa Internacional di futbol, cu a inclui tur region di mundo, a wordo celebra dentro di e weganan Olimpico di Paris na 1924.
E aprobacion oficial tin e meta di fomenta e deporte na henter mundo, particularmente futbol, como un medio pa impulsa paz, desaroyo di empoderamento di hende muhe adulto y mucha muhe y e obhetivonan di e Desaroyo Sostenibel, unda e futbol door di su alcance y popularidad, tin un papel sumamente especial.
Aworaki, asina cerca di e Copa Mundial di Futbol 2026, e celebracion di Dia Mundial di Futbol, posiblemente, ta bira mas significativo na momento cu tur team cu lo participa ta den su maximo preparacion, hunto cu FIFA y tur e ekiponan di narador, fotografo, presentador di noticia, canalnan di television, y henter un conglomerado profesional cu ta bay move e weganan trascendental aki, universalmente.
