Prome Minister Eman a confirma Diahuebs cu SMAC ainda no tin permiso
ORANJESTAD (AAN): Den un entrevista recien cu DIARIO, Prome Minister Mike Eman a duna di conoce cu el a ricibi un documentacion cu un conseho cu lo bay Conseho di Minister awe, diabierna pa asina tuma decision na ken e permiso pa Carnaval ta wordo otorga. Prome Minister a expresa cu pa dialuna benidero esaki lo ta conoci. Actualmente SMAC ainda no tin e permiso.
Prome Minister na un forma humoristico a expresa cu no tin Carnaval sin ambiente, refiriendo na discusionnan cu tur aña ta pasa durante e temporada cultural aki.
Mientras cu Carnaval ta e temporada cu mas union ta trece den nos pueblo, na unda cu ciudadanonan ta bin hunto pa traha riba creatividad. “No ta importa di cua nacionalidad, of entrada di cada ken, Carnaval ta un celebracion di union y hopi animo. Banda di e aspecto economico y discusionnan, nos mester balora nos Carnaval. Esaki ta duna fortalesa na e fibranan cu ta wanta nos comunidad uni”, Prome Minister Eman a expresa.
