Celebracion mes ta riba Diasabra
ORANJESTAD (AAN): Awe ta Dia di Portugal! DIARIO a compronde cu e aña aki ta di 58 aña cu ta celebra Dia di Portugal, Dia di Luis Vas de Camoes y Dia di Comunidad Portugues rond mundo na Aruba cu Santo Sacrificio di Misa ta recorda e di 58 aña di existencia di e celebracion aki.
Historia ta mustra cu na aña 1965 Sr. Aventura Quimarais a tuma e iniciativa pa e tempo ey celebra dia di Portugal conhuntamente cu un grupo di portuguesnan na Aruba. E celebracion a inicia cu un marcha saliendo for di cas di Sr. Aventura riba Wilhelminastraat pa Wilhelmina Park.
E grupo di Portguesnan aki cu tabata masha uni den un forma hopi emocional a bini hunto p’asina gradici Aruba pa e bon aceptacion di e Portuguesnan na Aruba.
Portuguesnan ta conoci di ta hende cu ta traha duro y lucha te na final. Nan a contribui na economia di Aruba den añanan 60, 70 ,80 ,90 y te cu dia di awe. Tambe nan tabata conoci pa haci trabaonan duro y hopi pisa.
E Portuguesnan tabata busca un futuro pa nan mes y nan famia y no tabata importa e trabao. Pa nan tabata mas importante e dignidad di por tin un trabao y cu un dia nan lo logra.
Pa algun di nan, esaki tabata un cos no mucho bon pa haci, pero a sali fo’i nan pais pa traha y gana algo pa bay cas back cune, y no pa keda semper. Esaki tabata e deseo di mayoria di nan. Pero cu transcurso di tempo cosnan a cambia.
Asina tambe e Portuguesnan poco poco a cuminsa integra mas y mas den e sociedad Arubano na unda nan a eherce diferente funcion den comunidad, educa nan famia y ainda nan ta aki of asta a ser dera riba e dushi isla di Aruba.
Nan exito ta sin duda nan capacidad di adapta den diferente ambiente mientras cu na mes tempo mantene bibo y practica e balornan di nan origennan.
P’esey nos ta gradici ARUBA un bes mas pa a acepta e comunidad Portugues.
Awe Diabierna 10 di Juni 2022 pa 7or di anochi na Misa di Fatima na Dakota lo celebra santo sacrificio di misa en coneccion cu Celebracion di Dia Nacional di Portugal.
Un Invitacion special y personal ta bay na e comunidad Portugues como tambe na henter e pueblo di Aruba pa asisti na e celebracionan aki.
Directiva di FSCP Club Primavera ta desea na tur Portugues residencia aki na Aruba *un feliz dia di Portugal*. E dia aki ta un dia cu nos ta recorda tambe e raiznan di nos identidad propio y tambe unda nos orguyosamente ta forma parti di e isla aki y cu ainda nos ta parti di e desaroyo di Aruba.
Celebracion ta sigui diasabra 11 di Juni 2022: DIARIO a compronde cu lo tin Diasabra e Fiesta Cultural Folclorico cu Banda Musical Primavera e gran celebración aki ta cuminsa pa 7or di anochi caba na CLUB PRIMAVERA entrada ta gratis un y tur ta Bemvindo Bon Bini
Lo ta bay tin cuminda típico Tradicional Portugues manera Bacalhao y nos famoso Espetada a Portguesa.
Invitación pa Comunidad Portugués y tur decendientes Portugués y tambe tur otro Nacionan ta Bon Bini pa bin Celebra dia Nacional di Portugal Dia 10 y Dia 11 di Juni awor.
