Pabien na tur grupo y club di danza na Aruba:
ORANJESTAD (AAN) Na 1982, door di iniciativa di e Comite Internacional di Danza, a wordo proclama door di UNESCO, e dia 29 di April como Dia Internacional di Danza. A scoge e fecha aki pa conmemora e natalicio di e bailarin y coreografo Jean-Georges Noverre.
E obhetivo di e Dia Internacional di Danza ta pa duna homenahe na e danza como un disciplina di arte universal y diverso, reuniendo tur esnan cu a elegi e forma aki di expresion, sin barera cultural, politico of etico.
Atravez di movimentonan corporal, e sernan humano a expresa y comunica nan mes for di temponan ancestral. Danza ta, por excelencia, un forma di expresion y interaccion social acompaña pa ritmonan acustico, cu finnan di entretenimento artistico, cultural y religioso.
E danza ta wordo yama tambe e “lenguahe di curpa”, siendo un expresion di emocionnan cu ta comunica sentiment atravez di movecion.
Den actualidad ta destaca estilo y generonan diferente cu ta bay for di e danza tradicional y academico te e cotidiano, segun e diferente culturanan: por ehemplo, danza popular of folklorico, danza clasico, danza moderno.
Tur estilo y genero di danza mester conta cu e siguiente elementonan: espacio, coreografia, entrenamento y bistimento.
Na Aruba ta existi diferente club di danza tanto di mucha como di adulto y profesional den tur tipo di expresion, locual ta un orguyo grandi pa nos Isla chikito, pero culto y talentoso. Pabien na tur e gruponan di baile di Aruba, den nan dia, proclama pa UNESCO cu e fecha di awe 29 di April, for di 1982.
