ORANJESTAD (AAN) Awe, 20 di Maart, ta Dia Internacional di Felicidad. Un dia cu enberdad nos tur lo mester percura pa ta feliz.
Felicidad ta un meta humano fundamental den bida di tur persona, y cada persona tin su mesun concepto di kico ta felicidad.
E Asamblea General di Nacionnan Uni a decreta den su resolucion 66/281 di aña 2012, cu dia 20 di Maart ta wordo celebra e “Dia Internacional di Felicidad” pa reconoce e relevancia di e felicidad y bienestar, como dos aspiracion universal di e ser humano.
Asamblea General di Nacionnan Uni ta reconoce e mesun obhetivo y ta pidi “un enfoke mas inclusivo, ekitativo y ekilibra di e crecemento economico cu ta promove e felicidad y bienestar na tur e pueblonan.
Gobierno y organizacionnan internacional mester inverti den condicionnan cu ta faborece e felicidad, pa medio di e defensa di e derechonan humano y e incorporacion di e dimensionnan di bienestar y medio ambiente den e marconan politico, manera e 17 Obhetivonan di Desaroyo Sostenible. E eficacia di e gobiernonan den e mantenimento di paz y orden social, mescos cu den e ambitonan di recaudacion di impuesto, e institucionnan huridico y e prestacion di servicionan publico, ta estrechamente relaciona cu e promedio di satisfaccion vital.
Nacionnan Uni ta invita tur persona di cualkier edad, mescos cu tur aula escolar, empresa y gobierno, uni nan mes na e celebracion di Dia Internacional di Felicidad.
E informe tocante “Felicidad Na Mundo 2025” lo wordo presenta awe, dia 20 di Maart, cu un serie di acto, cu lo wordo retransmiti direct na henter mundo, pa celebra e Dia Internacional di Felicidad. E edicion di e aña aki, ta bolbe inclui un clasificacion di e paisnan segun nan nivelnan di satisfaccion cu bida. Seguidamente lo aborda e tema “Cuida y Comparti” for di diferente angulo.
