Historia real di refineria y e mentalidad di “pocket money” di Benny
*Hasta burico ta corda con AVP kier a uza e placa di limpieza tereno
*DIARIO a bati alarma pa Citgo como peligro economico y criminal
ORANJESTAD(AAN)—Pa por sirbi bienestar di un Pueblo mester di honestidad. Awe na un momento cu mester reforma economia di Aruba y sigur mester pone punto final na e temporada di refineria di acuerdo cu desaroyonan mundial, Benny Sevinger ta bolbe duna prueba di su nivel politico, ora e lansa acusacion di “pocket money” cu lo tabata den wega pa deshaci di e proyecto Citgo.
Pa cuminsa ta bon pa aclarea, cu no tabata Prome Ministro Evelyn Wever-Croes, pero DIARIO cu a base di contactonan internacional na e nivelnan mas halto di mundo, a lansa e bom grandi na 2018 cu Citgo ta un aventura peligroso pa Aruba.
Pa comprende e magnitud di e peliger den cual e proyecto Citgo a hinca Aruba, mester bolbe na cambio di Gobierno na 2017, cu a bira e momento cu Aruba a haya oportunidad pa pone fin na un mundo di fantasia y hasta mentira politico.
A base di nos conocemento profundo di economia, realidad financiero y gobernacion di acuerdo cu leynan di Reino y Aruba, na 2017 DIARIO a constata cu Aruba tabata den un proceso di problema serio.
Un pais cu un debe nacional y cu a destrui e base di un democracia basa riba economia liber, cu a wordo viola ora e introduci e Fondo Biyonario di proyectonan “Bo Aruba” den cual placa di Pueblo mester a sirbi pa inversion den proyectonan cu no tabata cumpli cu e Ley di Contabilidad cu nos conoce wowo cera.
Aruba tabata mara na e Acuerdo di Citgo na un forma cu e base di comercio internacional no tabata permiti pa kibra.
Gobierno Mike Eman a hinca economia di Aruba den man di Nicolas Maduro, cu tabata usa Citgo como su baca di lechi y cu el a destrui pero tambe a wordo cambia den un neishi di crimen directamente dor di labamento di placa entre otro.
Funcionarionan halto di Citgo tabata den man di Husticia di Merca.
Esaki ta loke Gobierno Mike Eman a trece como gran salbador di economia y situacion financiero pa Aruba, despues cu na 1989 tabata Gobierno di Nelson Oduber cu a haci cu refineria na Aruba a sigui existi.
Burico ta yora y ta bandona tereno, ora scucha palabranan di Benny Sevinger, cu obviamente kier causa furor cuj spirito.
Na 1986 AVP tabata kier a uza e desmantelacion di refineria como solucion y kier a haci uzo di e placa cu a keda pa haci e tereno limpi, pa deshaci di e refineria.
Unda Benny Sevinger tabata ora DIARIO tabata presenta e plannan di AVP, cu hasta tabata papia di e peliger pa uza baño pa haci necesidad debi na e forma cu petroleo a placa den suelo di San Nicolas.
Nos ta gaña Benny Sevinger? Gobierno Eman a crea un susto contra refineria y hasta DIARIO tabata tin reserva ora Nelson Oduber a trece Coastal di Oscar Wyatt den e temporada cu petroleo a conoce un epoca nobo cu entrada di companianan nobo den un situacion politico mundial sumamente peligroso.
Kico a pasa cu placa di Valero cu despues a drenta? Pa cuanto placa a permiti Valero, cu kier a cumpra Citgo djis prome cu AVP a haci publico cu e ta papia cu Nicolas Maduro?
DIARIO a opone contra Citgo cu tabata un compania mes bancarota cu Nicolas Maduro cu mester a hunca 100 Miyon den Citgo Aruba, mientras Venezuela ni Citgo tabata tin placa.
Ta DIARIO a lanta para contra e proyecto di Citgo y a aplaudi e momento cu porfin Prome Ministro Wever-Croes a bay kibra e acuerdo cu AVP a firma cu Citgo, cu a hinca Aruba for di e tempo den un situacion mundial peligroso na man di e “banda” di Nicolas Maduro.
Te awe Citgo ta problema. Cuanto placa Aruba lo a perde si e no a laga e placa pa haci tereno limpi cay ora Juan Guaido a entrega Aruba e yabinan di Citgo, cu ta propiedad di Rusia tambe y cu Merca ta evita pa wordo bende dor di accionistanan cu tin e 50.1 porciento di accion den e compania?
Gobierno Mericano ta evita Citgo wordo bendi pa asina por paga 600 Miyon na debe. Na Januari Gobierno Joe Biden a bolbe firma tres luna di sosten pa evita cu hasta Rusia por exigi su accion.
Burico ta yora y ta bira lomba pa expresionnan di Benny Sevinger y e pocket money cu semper nos a bisa cu mester investiga ora Gobierno Mike Eman a entrega Aruba y economia di Aruba na Nicolas Maduro.
Esaki ta e berdad, Benny! Bay traha bo analisis awor
