ORANJESTAD (AAN): Ya caba, Defensa Hulandes a usa e barco Zr.Ms. Holland pa manda cantidad di material y personal pa duna un man na Haiti. Specificamente pa yuda lanta un Hospital temporal riba veld.
Pero awor DIARIO a haya sa, cu Guardacosta di Caribe Hulandes ta usando nan avion Dash-8 tambe pa ehecuta varios vuelo ultimo dianan aki rumbo pa Haiti.
Fuentenan a indica cu e avion Dash-8 a transporta material necesario, y tambe personal di Defensa Hulandes pa pais, cu a wordo afecta Diasabra dos siman pasa door di un teremoto pisa.
E personal di Defensa Hulandes cu a wordo hiba Haiti, ta bay yuda cu presta asistencia na e pais den forma di coordinacion, y yuda e habitantenan afecta.
