Sorprendi cu e team a laga coach agresivo bek riba tereno
- Referee a pone trabao abao mesora debi na esaki
- Dos luna pasa a comete maltrato severo riba referee local
ORANJESTAD (AAN): Con un team di Futbol ta hinca den nan cabes pa bolbe pone un coach agresivo back den su team, ta algo cu pueblo di Aruba no por compronde. Y esey ta algo cu e Cuerpo di Referee na Aruba tampoco no por digeri, y pesey nan a dicidi na pone nan trabao abao e siman aki.
Arubaanse Voetbal Bond (AVB) pues un biaha mas a topa cu un obstaculo durante temporada aki di wega, y tur cos ta bay cay back riba loke a socede dos luna pasa, esta na comienso di October 2023 ora cu arbitro Luis Bedoya a ser agredi seriamente door di un coach di team infantil di SV La Fama.
Tur hende a mira potret y video di e Referee cu a haya golpi severo y grave na su wowo drechi te cu el a perde e wowo. Y tur esey debi na un boter cu e coach Neil Jansen a tira den su direccion.
AVB tampoco no kier mira e coach mas: Tabata Diamars cu AVB a ricibi informacion cu e Cuerpo di Arbitro na Aruba a dicidi pa pone fluit abao un biaha mas. E motibo cu nan a stop di haci nan trabao, ta cu pa nan sorpresa, a bin tuma nota cu e Coach Neil Jansen kende tabata envolvi den e evento desafortuna na October, caminda referee Bedoya nan a perde su wowo, lo ta activo atrobe como coach.
Un boletin emiti Diamars anochi door di AVB, ta enfatisa claramente cu e bond di futbol na Aruba a avisa SV La Fama y tur persona encarga necesario, cu coach aki Neil Jansen no por ta activo mas den rol aki. AVB aki a pensa riba e seguridad y bienestar di tur hende envolvi, y mas cu esey, como muestra di respet pa e principionan di fair play y safeguarding di FIFA.
AVB na e momento aki no tin ningun confirmacion si e alerta di AVB dirigi na SV La Fama a worde ignora, pero mirando e desaroyonan di Diamars anochi cu referee a dicidi na bandona trabao, AVB a tuma accion inmediato.
Segun AVB a declara Diamars anochi mes, nan a cuminsa discusionnan cu e refereenan pa compronde nan preocupacionnan y ta buscando un solucion cu ta pone seguridad y respet como prioridad den comunidad di futbol.
Nos ta kier enfatisa na tur clubnan y individuonan envolvi den futbol cu e compromiso pa fair play, sportsmanship, y bienestar di tur cu ta asocia cu e deporte aki ta keda intacto. Nan ta stimula dialogo habri y cooperacion pa sigura un ambiente sigur y respeta pa tur involucra.
Neil mester busca otro carera: AVB ta reitera cu nan no ta aproba di e situacion caminda cu e coach Neil Jansen ta sigui activo den futbol.
Na lus di e eventonan reciente, AVB a plania Diaranson anochi un reunion urgente cu e refereenan pa trata e situacion actual. E resultado di e reunion aki ta lo ta decisivo pa nan por duna mas informacion tocante e suspencion di e weganan.
Te na ciere di e edicion aki di DIARIO, no a ricibi ainda detaye kico e decision tuma ta.
Pero si AVB ta bolbe reitera cu nan ta compronde e impacto cu e decision aki por tin riba e comunidad futbolistico, y nan ta gradici atletanan local pa nan comprension mientras ta trahando pa por continua weganan mas pronto posibel.
Pero tanten cu no tin referee, no por tin wega aworaki.
Loke a pasa na luna di October: Tabata na comienso di October cu Cuerpo di arbitro a acerca AVB pa expresa nan preocupacion cu e agresion violento riba veld, y a indica cu nan lo subi tereno bek te ora mihor medidanan ser tuma pa mitiga agresion contra arbritronan.
Na comienso di October mes, Recherche a detene e coach Neil Jansen di team U13 di La Fama, pa e caso di ‘zware mishandeling’ unda el a pone cu Referee Bedoya keda hospitalisa y na final a perde su wowo. Tur esey debi cu Neil Jansen a agredi arbitro cu boter na final di wega di La Fama vs. RCA
Parce cu Neil Jansen a rabia asina hopi y no por a domina su mes mas, djis pasobra durante wega di La Fama vs. RCA, su team a haya 2 carchi cora. RCA a gana e wega y despues el a bay discuti cu referee Bedoya y dal’e cu boter y pone perde wowo y haya mas golpi na cabes.
Pa bienestar di Aruba, y segun deseo di Arubaanse Voetbal Bond... kizas Neil Jansen tin di aleha di futbol pa semper.
