ORANJESTAD (AAN): Autor y specialista literario Julien Ignacio ta presenta un storia traduci na Papiamento for di su buki titula ‘Goudjakhals’.
Titulo di e storia ta ‘Radio Gaga’. E presentacion ta tuma luga diahuebs dia 12 di maart di 7'or pa 8:30. Un invitacion ta bay pa un y tur.
Julien Ignacio (1969) ta skirbi y publica, entre otro, storia cortico, articulo, novela y texto pa teatro. Ignacio a studia ciencia di literatura y a traha como docente y e ta redactor na Hulanda.
‘Radio Gaga’ ta un storia na Papiamento cu ta wordo publica como buki, Ebook y tambe Audiobook. Alabes e ta un proyecto educativo cu ta bay scolnan local.
Ignacio ta un escritor Hulandes-Arubano. Su di dos buki Goudjakhals (2023), un coleccion di storia tocante migrante a gana dos premio. ‘Radio Gaga, e ultimo storia den e buki ‘Goudjakhals’, ta un homenahe na su wela Arubiano cu ta di Dakota.
E publicacion gratuito ‘Radio Gaga’ y e programa educativo rond di dje, ‘Radio Gaga na Aruba’, ta un produccion di Fundacion Dakota den colaboracion cu sra. Olga Buckley, sra. Joyce Pereira, Biblioteca Nacional Aruba, Fundacion Rancho y Colegio Arubano.
