Parlamentario Evelyn Wever-Croes:
*Aworaki no tin niun motibo pa sconde e conseho di bezwaaradviescommissie di LAR
ORANJESTAD (AAN): “Falta di duna informacion ta un patronchi visibel di ful gobierno AVP-Futuro, specialmente cerca Minister Gerlien Croes,” asina Parlamentario Evelyn Wever-Croes a expresa durante conferencia semanal di Fraccion di MEP dialuna mainta.
El a remarca cu den hopi otro pais, un minister cu nenga di duna informacion riba un biahe di trabao, sea a baha caba of a ser baha caba. Segun el a expresa, ta aki na Aruba so e acto aki ta keda sin consecuencia te ainda. “Nos no por culpa solamente Minister Gerlien Croes pa esaki, sino mester culpa e presidente di Parlamento, Marlon Sneek cu ta protehe Minister Croes y no kier yama e reunionnan cu nos a pidi riba e topico aki pa nos debati cu Minister Croes pa asina e tuma su conclusion si e ta baha of e ta wordo baha,” Parlamentario Wever-Croes a enfatisa.
El a subraya cu tanten Presidente di Parlamento keda trapa riba nos constitucion y riba nos reglamento di orden pa protehe un minister cu no ta duna informacion, ta pone nos democracia y fundamentonan constitucional di nos pais ta na peliger.
“Mi ta puntra mi mes cu si pa algo asina chikito, manera haci biahe di trabao den un jet priva, nan ta sconde, gaña y no ta duna informacion, con pueblo por confia nan cu e miyones y miyones cu nan tin poder riba dje? Con nos por confia cu ey si nan ta actua na e miho manera?” Wever-Croes ta questiona.
Mientras tanto, Parlamentario Wever-Croes a indica cu Fraccion di MEP lo sigui pone presion pasobra Aruba merece miho. E ta haci un yamada publico na Minister Gerlien Croes pa e publica e conseho Di bezwaaradviescommissie cu LAR a manda, y di eynan cada ken por dicidi kico lo bira e siguiente stapnan.
“Mientras tanto tambe, e minister lo tuma su seis simannan manera ley ta prescibi pa dicidi kico e ta bay haci cu e conseho di LAR, Aworaki no tin niun motibo pa sconde e documento aki. Transparencia no ta cuminsa aki despues di seis siman. Transparencia ta cuminsa awo cu e conseho ta cla caba. Ademas, nos lo haya e conseho di un manera of otro. Pakico no entreg’e awo cu e documento ta cla,” Parlamentario Wever-Croes a remarca.
Parlamentario Wever-Croes a enfatisa cu Fraccion di MEP lo sigui busca e berdad pasobra esaki ta deber come representantenan di Pueblo di Aruba pa haya sa e berdad pasobra Aruba merece transparencia.
