Inflacion ta menasa di bira e dolor mas pisa di tur pais na mundo --- *Cambio di clima por tin impacto serio riba prijs di cuminda --- *Prijs di petroleo ta sigui subi y ta sigui afecta tur prijs basico
ORANJESTAD(AAN)—Situacionnan social sumamente serio por ta resultado di e forma cu mundo ta wordo afecta dor di inflacion.
E topico principal di ayera tabata e forma cu prijs di petroleo ta sigui subi a base di e crisis na Ukraine, cu no tin solucion na bista. Na mes momento, otro problemanan cu a logra sconde, ta bini dilanti y ta exigi atencion den loke por bira un crisis social sumamente serio na 2022.
Durante e ultimo dos añanan, problemanan a sigui otro cu un frecuencia, cu a haci planificacion sumamente dificil.
DIARIO ta vigila tur cifra mundial y tambe reaccion di organisacionnan local y mundial importante.
Na final di 2021 informacionnan concreto a indica, cu si cifranan di Covid-19 no baha, e recuperacion mundial lo ta na peliger.
Na e momento e Fondo Monetario Internacional, IMF, a trece esaki dilanti ainda mundo no tabata na haltura cu e crisis di Ukraine lo a bira otro problema serio.
Tampoco mundo a haya e oportunidad real pa atende e medidanan internacional pa cambio di clima manera mester ta.
Februari 2022 a conoce mas cu prome mitar cu un mundo, cu mester cuminsa prepara su mes pa un aumento importante di costo di bida cu ta wordo ocasiona pa diferente aspecto.
Na prome luga mester anota e aumento continuo di prijs di petroleo cu lo sigui influencia prijsnan na un forma barbaro sigur den e prome mitar di 2022.
Informacionnan cu DIARIO ta ricibi ta mustra cu e aumento di costo di bida lo subi na un forma serio debi na e forma cu prijs di petroleo ta sigui subi.
Ayera e prijs di petroleo di paisnan di OPEC tabata alrededor di $94 Dollar y tabata sigui subi segun tur indicacion.
Esaki ta nifica cu prijs di tur producto atrobe ta confronta e peliger di subi, loke lo causa un inflacion, cu ta haya sosten di otro factornan.
Pa atende cu cambio di clima, diferente medida mester wordo tuma pa futuro. Medidanan cu hasta ta mishi cu e carni cu hende ta come y cu por conoce un aumento importante den prijs si tene na consideracion, cu loke por ehempel baca ta produci despues di a come, tambe ta influencia cambio di clima.
Esaki ta haci cu e produccion di e sector aki ta wordo seriamente afecta na paisnan cu a cuminsa actua contra e peliger cu sushi di baca y otro ganado ta produci.
Con lo reemplasa petroleo ta keda un pregunta, cu hasta ta mishi mas y mas cu e pregunta si gas mester ta na mes nivel cu petroleo.
Union Europeo ta trata ainda na pone gas riba e lista di combustibel limpi, cu tur tipo di hustificacion.
Cantidad di pais na mundo ta keda cu debe serio, mientras actualmente na e paisnan den Oceano Pacifico, Omicron ta aumenta barbaramente y ta afecta produccion.
Ora papia di paisnan den Oceano Pacifico ta papia di paisnan cu ta conoci como productor di articulonan mas barata y cu por wordo afecta.
Prijsnan di cuido medico, pago di debenan grandi cu paisnan a haci y cu paisnan no por carga mas, lo aumenta e peso di costo di bida pa mundo, cu mester keda pendiente pa cualkier cambio riba tanto tereno y sigur e crisis na Ukraine, cu ta afecta e cifra tan importante den costo di bida, cu ta prijs di petroleo, cu ta keda un peliger pa resultado economico, financiero y social.
