30 mil hende riba 12 aña ainda falta pa haya e vacuna
ORANJESTAD (AAN): Durante e siman cu ta terminando DVG a registra un aumento den vacunacion di esnan cu ta bin tuma e vacuna pa prome biaha, esaki ta un bon noticia y trend. Durante e siman di 23 pa 27 di augustus un averahe di mas di 225 persona a vacuna cu e prome dosis pa dia.
Si e tendencia aki sigui asina, den e siguiente simannan un averahe di 1000 persona pa siman por ricibi e prome dosis di vacuna y asina ta keda parcialmente protehi contra Covid-19. Despues di 3 siman nan lo tin cu bolbe riba e fecha di nan cita pa tuma e di dos dosis di e vacuna di Pfizer of si pa un of otro motibo e persona a lubida riba su cita e por walk in pa ricibi su di dos vacuna.
Esnan cu ta desea di ricibi e vacuna di Johnson and Johnson cu ta un solo un dosis, esaki tambe por haciendo un cita na number di telefon 522-4200 of 280-0101.
Na Aruba na e momentonan aki tin un cantidad di 30 mil hende riba 12 aña cu ainda falta pa haya e vacuna.
DVG ta desea di informa tur esnan 60+ cu ainda no a vacuna cu nan por Walk-in, cana kibra sin cita entre diamars te cu diabierna parti mainta entre 8:00 cu 11:30 pa ricibi nan prome of di dos dosis.
Pa haci cita pa vacuna por download e Aruba Health App y registra of via dvg.aw of tambe por yama 280-0101 of 522-4200.
