Caso den Corte
- Anteriormente a sali liber y a bolbe cuminsa bende droga
ORANJESTAD (AAN): E muhenan S.S. di 67 aña y S.S.J.A. di 32 aña, riba Dialuna mainta a wordo haya culpabel di bendemento di marihuana y cocaina na Sero Alejandro. E muhe S.S. ta mama di S.S.J.A.
E mama S.S. ta para riba cu e no tabata bende droga mientras cu e yiu muhe S.S.J.A. a bisa Hues cu e tabata esun cu tabata bende. Hues no a kere nan, mirando cu tin cantidad di testigo cu a declara di a cumpra droga for di nan. Ambos a wordo condena na castigo combina y bou guia di Reclassering.
Bendemento di droga: E acusacion cu Fiscal a presenta contra S.S. y S.S.J.A. ta cu entre 15 Maart 2024 y 12 December 2024, nan tabatin den nan poder marihuana y cocaina y tabata bende esakinan.
Ta asina cu Polis a bay haci investigacion na e cas na December 2024 y a bin haya 127 gram di marihuana y 41 gram di cocaina. Tambe a confisca 3.600 florin y 850 dollar.
Sali liber y bolbe bende droga: Hues a mustra cu S.S.J.A. y S.S. tabata sera pa bendemento di droga y na Maart 2024, nan a wordo laga liber. E mesun luna nan a bolbe cuminsa bende droga y Polis a bolbe detene nan.
Mama ta nenga di tabata bende droga: Segun S.S.J.A., e tabata bende y no su mama S.S. E mama S.S. a bisa Hues cu despues cu el a sali liber na Maart 2024, e no a bende droga mas. Hues a remarca cu tin testigonan ta bisa cu nan tabata cumpra for di S.S. y S.S.J.A. Segun S.S., por ta e hendenan ta mir’e na cas pero e no tabata bende. El a bisa cu e ta sera 7 luna inhusto.
Pa cu e cantidad di droga haya na e cas, S.S. a bisa cu no ta pasobra cu a haya e droganan kiermen e droganan ta di dje. Hues a remarca cu e ora ey, S.S. kiermen cu tur e testigonan a gaña.
Hues: Mihor busca trabao cu bende droga: Hues a mustra cu for di e relato di Polis, a haya marihuana y cocaina na e cas. Tin testigonan ta menciona e mama S.S. (Chichi Mona), e dama di edad, ta esun cu nan a cumpra droga for di dje. E yiu muhe a keda bisa Hues cu e so tabata bende. Hues a remarca cu S.S.J.A. ta bisa esey pero e testigonan ta bisa otro.
Segun S.S.J.A., e tabatin 3 siman ta bende. El a bisa cu el a haci esey pasobra e no por a haya trabao pasobra e no tin papel di bon conducta. Hues a remarca cu S.S.J.A. a bay haci cos cu a hinc’e den mas problema. S.S.J.A. a bisa cu e tin 4 yiu chikito cu e mester cria. Hues a mustra cu na e cas a confisca 3600 florin y 850 dollar. E mama S.S. a bisa Hues cu e tabatin den su cartera 1.600 florin y 420 dollar. Segun S.S., e 1600 florin ta placa di pensioen y e bonus cu a haya na December 2024. El a sigui bisa cu e dollarnan ta placanan cu el a gana na machine den Casino. Na opinion di S.S., e placanan no tin nada di haci cu bendemento di droga. Hues a mustra cu S.S.J.A. tabata condena na 4 aña di prison pa bendemento di droga y a sali y bolbe bende. Hues a remarca cu S.S.J.A. mester keda busca trabao cu no ta pidi papel di bon conducta y no bay bende droga.
Fiscal ta exigi 15 luna di prison: Fiscal a bisa Hues cu S.S. ta desmenti di tabata bende, pero tin 7 testigo entre otro cumpradornan di cocaina cu a bisa cu nan a cumpra for di S.S. Nan a reconoce S.S. riba potret. Fiscal ta haya proba cu entre Mei 2024 y December 2024, S.S. tabata bende cocaina. El a mustra cu a haya 41 gram di cocaina den e cas. Fiscal a sigui bisa cu tin 6 persona cu a bisa di a cumpra marihuana for di S.S. y a reconoce S.S. riba potret. Polis a haya 127 gram di marihuana den e cas.
Fiscal ta haya cu S.S. ta culpabel. Pa loke ta e yiu muhe S.S.J.A., Fiscal a mustra cu S.S.J.A. ta bisa cu el a bende 3 siman so. Pero tin testigonan cu a bisa di a cumpra cocaina for di S.S.J.A. Testigonan a bisa cu si e mama no tey, nan tabata cumpra for di e yiu muhe. Esey tabata entre Mei 2024 y December 20204. Fiscal a mustra cu tambe tin 2 testigo cu a bisa di a cumpra marihuana for di S.S.J.A. Esaki entre Juni 2024 y Dec 2024.
Fiscal a mustra cu durante 6 luna, S.S. y S.S.J.A. tabata bende droga. Fiscal a remarca cu na Maart 2024 nan a sali liber for KIA pa bendemento di droga y algun luna despues, nan ta deteni pa bendemento di droga na e cas. Fiscal ta haya cu nan no a siña di e castigo cu nan a haya.
Pa cu e castigo, Fiscal a mustra cu droga ta causa hopi criminalidad y miseria den famia. El a mustra cu e mama y yiu a haci esaki den nan tempo di prueba. Fiscal a exigi 15 luna di prison pa tur dos. Fiscal a exigi tambe, pa tur e droga wordo destrui y e placanan mester keda confisca.
Abogado: mr. D. Croes a bisa Hues cu antes S.S. tabata deteni pa bendemento di droga hunto cu su yiu S.S.J.A. Na opinion di abogado, Polis a pinta e cas como un lugar di bende di droga. E abogado a bisa Hues cu e declaracion di e usadornan di droga, no ta confiabel. E abogado a bisa cu ora e usadornan di droga wordo deteni y hinca den cel, nan ta declara kico cu bo kier, tanten cu nan haya nan libertad. El a remarca cu tur e compradornan ta adictonan pisa di droga. Ta asina cu tur a wordo laga liber asina cu nan a duna declaracion. El a bisa cu ni e mama y e yiu no ta usa droga. Na opinion di mr. Croes, e yiu a hay’e den un situacion s
n por haya trabao y mester mantene su 4 yiunan chikito. El a hay’e ta bolbe bende droga. E yiu ta sintie malo cu su mama ta sera siendo cu ta e yiu tabata bende droga y no e mama. E abogado ta haya cu e yiu mester di ayudo y guia pa e por haya trabao. Mr. Croes a pidi Hues pa tene cuenta cu salud di e mama S.S. kende ta sufri di sucu. E abogado a pidi pa declara S.S. liber y pa e yiu haya castigo igual na loke el a sinta caba.
Sentencia: Hues a sera tratamento di e caso y a dicta sentencia di biaha. Hues a rechaza e defensa su punto di bista cu no por confia declaracion di testigonan. Hues ta haya cu e testigonan a duna declaracion bon cla y a reconoce e mama y yiu riba potret.
Hues a bisa cu e ta kere declaracion di testigonan kendenan a bisa cu si e mama no tey, nan ta cumpra for di e yiu muhe. Hues ta haya legalmente proba e acusacionnan esta cu S.S. y S.S.J.A. ta complice di posesion di droga y bendemento di droga.
Pa cu e castigo, Hues a mustra cu no ta promer biaha cu nan ta cay sera pa bendemento di droga. Hues a remarca cu e mama y yiu tin nan problema financiero pero door di bendemento di droga, ta crea problema di criminalidad. Hues a tene cuenta cu nan situacion personal. Hues ta haya cu ta importante pa nan por drecha nan bida y haya guia pa asina no ta sigui cay den bendemento di droga.
Hues a condena e mama S.S. y su yiu S.S.J.A. na 20 luna di prison, di cual 10 luna ta condicional cu un tempo di prueba di 3 aña. Hues tambe a ordena pa e mama y yiu cay bao supervision di Reclassering.
Hues a hala e mama y e yiu nan atencion cu nan no por haci nada malo durante 3 aña sino nan lo haya e 10 luna condicional extra riba e castigo cu nan lo haya. Hues a bisa cu e placanan lo keda confisca pasobra e ta haya cu esaki ta producto di bendemento di droga. Hues a ordena tambe pa e droganan wordo destrui.
