Hendenan a mira explosion basta briyante riba palo di luz
ORANJESTAD (AAN): Un situacion di urgencia a presenta su mes Diadomingo anochi laat den area di Tanki Leendert, ora cu diripiente habitantenan a tende un sonido fuerte similar cu explosion, y mesun momento coriente a bay.
A resulta cu na un palo di luz cu ta situa como 85 meter pariba di Almacen Elunid, hendenan a mira un arco di plasma di voltahe halto riba e palo di luz dilanti un cas na Tanki Leendert. Esaki ta situa net otro banda di caminda di e conocido Snacktruck Arucamba Snacks.
E arco aki entre e wayanan di coriente mas na halto, a produci un luz color blauw/biña basta briyante cu a hasta ilumina cielo, y mesora coriente a bay. Tanki Leendert a bira scur, Tanki Flip a bira scur, Shaba a bira scur, Matadera a bira scur.
Personal di NV Elmar a acudi na e lugar pa mira kico ta pasando, y pa nan sorpresa ora di yega a nota cu tur fuse di voltahe halto a trip. Y na e palo di luz, na halto mey-mey di e wayanan di coriente, a bin descubri blaas di material mylar, cu posiblemente tabata yena cu gas helium.
Un hende adulto of mucha pa ekibocacion a laga e blaas bay for di un di e casnan ey pariba, of e lo a los for di e veld di Futbol y Baseball cu tin poco meter mas pariba riba e caminda pa Matadera.
E blaas di material Mylar ta fabrica di foil, y ora cu nan mishi cu wayanan di coriente, esaki ta ocasiona un corto circuito y ocasiona blackout. E ta daña ekiponan tambe di compania di electricidad.
Personal di NV Elmar pa 10:35 pm a start na isola e problema eynan, pa asina nan por a duna e barionan mas leu coriente bek. Finalmente mester a usa truck pa subi bay na halto, y los loke a resta di e blaas for di e wayanan di coriente. E blaas ta uno color blauw imprimi cu confetti den tur color y cu e palabra “Happy Birthday” na blanco.
Un hende den e area a laga e blaas aki bay halto, y causa molester pa un area basta extenso di Noord.
Porfin despues di a kita tur esaki, te banda di 11:09 pm a logra duna tur hende coriente bek.
E di dos biaha: Loke a socede Diadomingo anochi, a bira e di dos biaha cu algo similar ta socede den Tanki Leendert. Algun aña pasa algo similar a socede na Tanki Leendert mas pariba, esta riba e caminda pabao di Rococo Plaza bay west. Eynan un blaas Mylar yena cu Helium tambe a dal den wayanan di coriente, ocasionando blackout. Awor na 2024 un biaha mas algo similar ta socede na Tanki Leendert.
Otro caso: DIARIO ta corda tambe con na luna di Maart 2017 cu algo similar a socede riba caminda principal di Piedra Plat, ora cu basta bario a keda sin coriente debi na blaas Mylar conteniendo Helium a bay dal den palo di luz riba caminda principal di Santa Cruz pa Paradera. E tempo ey, coriente a bay na Piedra Plat, Tamarijn, Sero Pita, Casibari, Sero Preto, y Meiveld y vecindario.
Ultimo tempo hopi hende ta cumprando e blaasnan tipo Mylar aki (e ta blink metalico asina), pa celebracion. Tene cuidao cu nan no ta bula bay y bay pega den wayanan di coriente.
