Universidad di pionero Gray riba tereno di horcan ta cambia su cifranan
*El Niño ta topa cu un oceano cu por kibra record di temperatura halto
*Influencia biento di direccion contrario vs un oceano na candela
ORANJESTAD (AAN) — Oceano Atlantico, cu ta forma e ruta maritimo entre costa di Africa y region di Caribe, cu ta e neishi di mayoria di sistema tropical.
2023 a habri cu un situacion cu a exigi pa for di momento cu el a haci su entrada cu Januari, ya e prome horcan di aña a wordo registra pa e zona cu ta wordo considera den asunto di horcan, como zona Atlantico.
Despues Arlene, Brett y Cindy a presenta riba pantaya, manera Aruba ta bon na haltura pasobra bientonan fuerte na nivelnan mas halto di pabau, a dicidi cu no ta bati alarma di horcan ni tormenta na Aruba for di tempran den e temporada 2023.
Kico e situacion lo ta pa resto di e actual temporada?
Dos instancia a presenta nan prediccion anual cu ta NOAA, e agencia di administacion atmosferico y di oceano nacional di Merca y e universidad Mericano, Colorado State University.
E forsa di voz di Colorado State University ta resultado di e papel cu Professor William Gray a hunga den e evolucion di ciencia moderno riba tereno di horcan.
Gray ta wordo considera pionero den e materia di horcan y a keda activo como experto di horcan y cambio di clima hasta despues cu el a retira na 2005 di Colorado State University.
E informacion di e siman aki cu Colorado State University a aumenta e cantidad di sistemanan tropical cu por forma na 2023, sigur ta haya atencion.
Den su informacionnan NOAA a anuncia cu por tin 12 pa 17 tormenta tropical di cual 5 pa 9 por bira horcan y 1 pa 4 di nan por desaroya y bira un horcan mayor cu ta di categoria 3 of mas fuerte.
NOAA a base su mes asina cu na 2023 por papia di un chens di 40 porciento cu un temporada di horcan cu ta mas o menos “normal”. Na mes momento el a splica cu tin un posibilidad di 30 porciento, pues menos, cu e temporada actual di horcan lo ta mas abou of mas halto cu normal.
E informacion oficial di NOAA a topa awor cu un pronostico ahusta na research di Colorado State University cu ta papia di actividad tropical riba normal durante 2023.
E cantidad di sistemanan tropical cu ta wordo spera dor di Colorado state University, a subi di 15 pa 18, di cual 9 por bira horcan y cuatro por bira horcan mayor.
Ora compara e motibonan pa cual tin un diferencia importante den e pronosticonan di NOAA y di Colorado State University, Aruba mester bolbe na e situacion cu el a conoce algun siman pasa ora un sistema tropical a pasa pa Noord di Aruba y kibra den e vecindario.
DIARIO a mustra con bientonan na nivel halto a kibra e sistema, loke ta un efecto tambe di e momento cu El Niño ta dicidi pa condicionnan di tempo den e region Caribense.
Durante temporada di horcan 2023, e condicionnan aki cu ta afecta formacion di horcan y ta baha e posibilidad pa horcan lo ta presente den Caribe, pero nan lo no ta mas fuerte cu e impacto di cambio di clima, cu ta produci un oceano sumamente cayente y cu ta bira candela cu ta aumenta e formacion di sistemanan tropical.
Kico e cambionan aki ta nifica pa publico?
Cu e posibilidad pa desaroyo tropical durante e temporada di 2023 ta bira mas grandi aunke na e momentonan aki un sistema so ta move den Atlantico y probablemente lo no causa impacto pa e continente.
Pero ta keda e realidad di semper den temporada di horcan y cu pa Aruba a bira visto na 2022 y 2023.
Kico e cambionan di clima lo trece cune? Con sistemanan lo desaroyo y con nan lo cana?
Na 2023 e temporada di horcan ta bati alarma pa e realidad cu tur hende mester keda den estado di alerta.
Durante añanan cu poco actividad, daño enorme ta wordo causa pa sistemanan tropical.
No ta bay pa e cantidad di sistema den e temporada di horcan, pero pa e realidad directo y indirecto cu temporada di horcan ta produci.
Den e cuadro aki estado di alerta mester keda presente aunke cifranan di NOAA ta algo menos cu e cifranan di Colorado State University.
Si awe e gran experto, e pionero riba tereno di horcan William Gray mester papia, sigur e lo a adverti contra e peliger bida humano y paisnan prome cu e cuminsa splica detayenan cu expertonan mester atende.
