ORANJESTAD (AAN): Director di Aruba Trade & Industry Association (ATA), Herrick Henriquez,
a duna di conoce cu na fin di 2023 y inicio di 2024 a cuminsa papia cu gobierno y stakeholders riba e tema di scarcedad di trahado.
El a indica cu aña pasa, e ex-minister di Labor a instala un grupo di trabao, un taskforce' pa haci un estudio riba esaki y na augustus a bin un instruccion di maneho pa bin cu mas sugerencia. Sinembargo, door di e situacion di e minister e tempo ey, esaki a tranca un rato.
Henriquez a sigui bisa cu ora cu Minister Cicilia a sinta como minister di Labor a reuni cu ne un luna pasa y a trece e puntonan aki dilanti atrobe. Por a mira cu despues di dos siman, Minister Cicilia y Minister Dowers a tuma e decision pa e asunto di e permisonan di trabao bay DPL door cu tin basta trabao awor riba mercado, pasobra tin scarcedad riba mercado.
ATIA a combersa cu su miembronan riba e tema aki y e miembronan ta indica cu tin scarcedad di trahado, proyectonan ta inicia, hotelnan ta habri y e mercado ta limita. Esey a pone cu a papia cu e minister y tambe cu DIMAS over di esaki pa wak con por agilisa e proceso, pero semper enfocando riba e hendenan cu ta na Aruba prome, e director di ATIA a remarca.
El a agrega cu e Arubiano mester ta na prome luga y tambe mester tene cuenta cu esnan cu ta biba ma Aruba y cu por ta, ta indocumenta of ta trahando caba via un otro manera di traha, pa asina regula esaki y pa nan cuminsa contribui na economia di Aruba y na e fondonan social.
Banda di esaki ATIA ta kere cu e leynan di labor mester wordo actualisa y tambe atende cu sector Horeca. Pa loke ta dunado di trabao, el a indica cu nan ta trahando schedulenan mas flexibel.
