ORANJESTAD (AAN): Aruba Trade & Industry Association (ATIA) ta bay tin su 'Corporate Event' diabierna awor y pa esaki Herrick Henriquez, director di e organisacion a haci un invitacion na miembronan como no miembronan pa participa.
El a laga sa cu ta bay tin un papel di miembronan cu den temporada di Covid a cambia strategia y hasta a crece. Tambe ta bay tin un panel di gobierno unda ta bay papia cu nan y sinta cu nan den un panel pa discuti con comercio por yuda nan pa implementa nan vision y con por traha hunto.
Henriquez a agrega cu despues di esey ta bay tin un 'networking event' ya cu ta wak cu mas y mas hende kier e 'conexion social' bek pa conecta atrobe cu amigonan, otro comerciantenan pa e negoshinan cuminsa lora.
E panel di comerciantenan ta inclui Oliver Vieira, Wilfred Ras, Jan Segers y Hubert Dirks.
Gobierno lo presenta un panel di Ministernan; Minister Evelyn Wever-Croes, Minister Geoffrey Wever, Minister Xiomara Maduro y Minister Glenbert Croes.
E tema di e evento e biaha aki lo ta 'Survived Covid - Aruba's Great Pivot' y lo tuma lugar na Tierra del Sol di 7 pm pa 11 pm.
