Director, Herrick Henriquez:
ORANJESTAD (AAN): Herrick Henriquez, Director di Aruba Trade & Industry Association (ATIA), a duna di conoce cu a manda un carta den luna di Februari pa Departamento di Impuesto unda ATIA a puntra pa un reunion cu nan pa papia riba e practica di e ley nobo cu a drenta na vigor 1 di Januari 2023.
E ley, 13 di December 2022 a bay Parlamento, a bisa, y despues a pasa e ley y 1 di Januari 2023 a drenta na vigor. Gobierno tabata tin dos siman pa prepara p'e y si a hisa e BBO so, pero a hinca hopi mas cos den e ley, a remarca.
Algo otro cu a hinca den e ley ta 'verleggingsregeling' unda ATIA kier mas informacion pasobra te hasta expertonan di impuesto, nan mes tin hopi incertidumbre cu kico precis ta inclui y kico no ta inclui.
Locual ATIA kier haci ta sinta, combersa y 'brainstorm' cu Departamento di Impuesto pa asina informa nan riba kico di berdad ta pasando den e mercado cu e ley nobo, Henriquez a indica.
El a agrega cu dialuna anochi, directora di DIMP a manda un email bek puntrando kico ta e topiconan cu kier discuti cu ne. Awor ta bezig cu un carta pa manda bek p'e cu e topiconan.
"Nos tin cu traha hunto riba e mercado aki pa nos por bay dilanti. Esey ta e meta cu nos tin cu e reunion", e director di ATIA a duna di conoce.
