ORANJESTAD (AAN): Asociacion Trabou di Hubentud na Aruba (ATHA), ta invita tur profesional, boluntario,
mayor y persona cu ta guia cu mucha y hoben pa participa den e Training Seguridad Social, cu lo tuma luga riba diasabra 18 di juli 2026, di 8:30 a.m. te 12:00 p.m., na Club Don Bosco (Misa Santa Ana, Noord).
E training gratuito aki tin como meta pa fortalece e capacidad di personanan cu ta guia mucha y hoben, pa nan por crea un ambiente mas sigur, reconose riesgo na tempo y actua cu mas conocemento den situacionnan cu por pone bienestar di mucha y hoben na peliger.
Durante e training, expertonan lo comparti informacion practico y interactivo riba tres tema importante:
EHBO (Prome Auxilio): fundamentonan di prome auxilio y reaccion den caso di emergencia.
Vaping y Droga: impacto, riesgonan, reconocemento di senalnan y prevencion.
Proteccion di Mucha y Hoben: con preveni abuso, negligencia y crea un ambiente sigur y proteha pa mucha y hoben.
E training ta contribui directamente na fortalecemento di comunidad door di duna guia, lidernan di organisacion, maestro, coach, boluntario, mayor y otro profesionalnan e instrumentonan necesario pa proteha y guia mucha y hoben cu confianza y responsabilidad.
Participacion ta completamente gratis, pero registracion ta obligatorio. Registracion:
https://form.jotform.com/242187436029863
ATHA ta anima tur persona cu ta traha of boluntario cu mucha y hoben pa probecha e oportunidad aki y sigui inverti den un Aruba mas sigur pa nos muchanan y hobennan.
