ORANJESTAD (AAN) – Franchesca Heinze, director di ATHA (Asociacion Trabao di Hubentud Aruba), a comenta den entrevista cu DIARIO cu ATHA ta hopi druk for di comienzo di e aña en curso.
ATHA ta enfoca riba mucha y hoben, y ta carga e trabao cu
hubentud como Asociacion, pa su miembronan.
E proyectonan cu ATHA ta desaroya ta bayendo bon, Franchesca a indica. Un proyecto cu nan ta trahando riba dje, specialmente enfoca na su miembronan, cu ta mas reciente, ta e “vacancy kamp”.
“Nos ta bezig trahando duro riba e parti aki y nos tin diferente articulo nobo cu nos ta bendiendo pa recauda fondo pa sostene e participacion di e muchanan na e ‘vacancy kamp’ cu nos miembronan lo organiza entre Juli y Augustus, y tambe algun na October” Heinze a duna di conoce.
El a agrega cu e participacion ta varia. Mas tanto ta e muchanan cu ta mas activo; pa e hobennan ta un tiki challenge pasobra nan ta interesa den algo pero algun dia despues nan no ta interesa mas, y ATHA ta keda draai e interes y wak kico ta biba den e hoben pa sigui participa y pa ATHA tambe sigui tuma parti den nan formacion.
Aunke ta un proyecto cu lo wordo ehecuta otro aña, ATHA ta trahando riba desaroyo di su website, pa asina e social media inter-actua cu e hobennan, na un manera miho. ATHA na e momentonan aki ta reuniendo cu e miembronan pa haya feed back kico ta e necesidadnan cu nan tin, pa asina otro aña, por ehecuta tur esakinan structuralmente. Pa loke ta e parti di scouting, Franchesca a indica cu nan ta hopi activo y den futuro ATHA cu Scouting lo ta trahando hunto riba cierto desaroyo, pero e no por papia mucho di dje ainda.
