ORANJESTAD (AAN): Ateliers '89 Punto Di Bellas Arte Aruba a mustra cu nan ta cla pa e gran apertura di nan exposicion nobo.
Diahuebs awor 19 di Mei pa 8:00 pm, unda lo presenta 4 diferente exposicion nobo di su programa nan andando. Manera Arte Den Bario y workshop nan di 3D, Fotografia y Film.
Arte Den Bario ta un programa di Tra’i Merdia cu Ateliers '89 ta bin ta ehecutando ya pa mas di 10 aña caba. Esaki como su proyecto especial pa muchanan di menos recurso den e diferente bario nan local. Aña pasa y aña aki a duna diferente di e workshop nan aki completamente gratis na participante nan di, Fundacion Centro Familiar Sabana Basora cu colaboracion di señora Josefina Gross y e proyecto Gen297 di ATHA bao guia di señorita Franchesca Heinze na Centro di Bario Brazil.
Awor a haya e oprtunidad unico pa mustra un muestra rasonable di e obra nan traha cu colaboracion di Fundacion Eterno bao guia di señora Osaira Muyale. Cu pintura, dibuho y 3D. Musica y Film bao guia di Adriano Nanof di Fundacion Cine Aruba. Durante e workshop nan aki a traha cu mucha nan di edad nan rond di 8 pa 16 aña. E no solamente tabata pa trece e hoben nan aki den contacto cu arte si no tambe pa siña nan expresa nan mes den tur otro forma y disciplina.
Esaki ta haci e exhibicion aki den nos White Box, uno hopi interesante mes. Na unda por observa y purba na compronde cada obra y personahe cu ta papia pa su mes. Den e sala nan mayor nos ta mustra e resultado di Fotografia y 3D cu plastico recicla.
Den e tempo corto di un luna e participantenan a traha duro pa realisa y logra mustra nan trabao nan nobo den ambos disciplina. Unda e parti di e exposicion di fotografia "repairing memories", ta resalta cu su potret nan precioso. Tambe e instalacion nan cu plastic "tracing steps" no lo ta menos interesante cu instalacion impresionante. Na final di e exposicion den e sala chikito lo presenta e obra nan di nos workshop pasa di film titula Equivocal. Aki bo tin di warda bo mira e obra cu e estreya nan mas grandi di e anochi e cacho nan estelar Mexicano na Aruba. Un anochi cu ta priminti di bira sin igual y cu hopi mes pa mira y experiencia y tur esaki cu entrada gratis.
No perde e oportunidad unico aki y apoya y siña balora e exprecionan aki contemporaneo di nos artistan y nan Arte! Nan ta hopi agradecido na tur patrocinador cu ta haci tur esaki posible.
