Ronella Croes, directora di ATA a splica:
ORANJESTAD (AAN)—Manera ta conoci, parti di e experiencia di e turista cu ta hospeda den un hotel cu tin beach cu lama su dilanti, ta pidi algo pa come y bebe den e area di beach, y generalmente e guest ta haya esaki den cup y tayo desechabel.
Den entrevista cu Directora di ATA, DIARIO a puntre ki maneho ATA tin den esaki, si ta hotel mes tin e responsabilidad di piki e articulonan desechabel aki.
Ronella Croes a contesta cu hotelnan, en general, ta pone hopi atencion na esaki, logicamente, pasobra e ta parti di e experiencia cu nan ta brinda. Tin hotelnan ta bay un tiki mas leu cu otro, adoptando diferente area cu kizas no ta nan responsabilidad pero ta asisti den esey.
Pero mester corda tambe cu tin hopi espacio publico unda por mira cu ATA ta bin dilanti conhuntamente cu otro autoridadnan, manera e proyecto cu ATA cu tin den porta, cu yama: “Beach Cleaning Project” den ATA, y cu ta encera cu nan ta spera pronto e makinaria specializa lo wordo poni den e playanan, pa haci nan, semanalmente limpi, den diferente area.
