Ronella Croes, CEO di ATA papiando di turismo regenerativo
ORANJESTAD (AAN)-- Ronella Croes, CEO di ATA, a sigui bisa den entrevista cu Matutino DIARIO, cu no solamente ATA ta bay eleva su esfuerzonan dirigi na e huespednan directamente, pero tambe riba e operadornan, esnan cu ta duna servicio.
“Esey tin tur atencion caba, pero loke mi ta bisando akinan, ta basicamente cu nos ta bay eleva nos atencion pa dirigi na nos socionan cu ta ofrece diferente servicio pero tambe na huesped direct ora e ta riba nos Isla pa e por haya mas informacion cu mi ta sigur cu e lo sigui, y cu e tin e, e ta conciente di diferente aspecto cu nos ta aprecia: nos reglanan, regulacionnan, pero tambe consehonan di kico si, kico no”, Ronella Croes a relata, indicando cu ATA ta bay haci esaki mas, conforme e maneho di comunicacion, cu ta cay bao “Responsible Tourism”.
“Esaki ta algo cu nos a cuminza papia cu esun cu ta considera un vacacion, of considera Aruba internacionalmente, un Aruba cu ta enfoca mas y mas riba esaki.
Esey no kiermen cu tur cos ta perfecto. Esey no ta loke nos ta bisando internacionalmente. Nos como destino, como un lider den e mundo di turismo, nos ta un lider, y pa nos mantene liderazgo mester ta papiando di cosnan cu kizas, otronan no ta papia di dje, cu ta inconfortabel, cu por ta bisa: con nos ta papia di esey siendo cu nos mes tin hopi cos pa drecha na cas? No! Nos ta e destino cu ta bin dilanti cu importancia di cosnan asina aki: importancia di cambio climatologico y diferente otro aspecto, cu Aruba ta haci pero tambe pasobra nos tin cu pidi atencion di esun cu ta bin bishita Aruba, y cu nos ta para p’e. Kico nos ta aprecia, y kico nos ta pidi abo, pa yuda proteha of yuda desaroya”, Ronella Croes a relata.
“Pues, papiando di un turismo regenerativo, cu tin e vision aki mas cu cinco aña; esey kiermen cu bo ta bishita Aruba y bo ta lag’e miho cu bo a encontr’e. Esey ta otro dinamica y evolucion cu nos kier mira sigui, den loke nos ta embarca aworaki, cu t’asina importante”, CEO di ATA, Ronella Croes a señala.
El a expresa cu no lubida cu ATA ta un voz cu ta duna hopi informacion, y hopi conseho pidi y no pidi. “E ta hopi diferente topico y si ta tras di cortina, den e caso di ATV y UTV, ta un ehempel di kico nos ta haci, tambe banda di e papia directo cu e huesped, of e educacion na nos industria y na nos socionan tambe”, Ronella Croes a subraya.
