Ronella Croes, Director di Aruba Tourism Authority:
ORANJESTAD (AAN) – Ronella Croes, director di Oficina di Turismo di Aruba (ATA), den un entrevista cu DIARIO a expresa cu tabata un placer pa su persona di tabata presente den Fort Zoutman, den cuadro di reanudacion di e operacion di cuater museo cu ta cay bao auspicio di Fundacion Museo Arubano.
E museonan aki ta: Museo Historico Arubano, Museo of Industry, Community Museum y Carnival Euphoria, CEO di ATA a menciona, agregando cu ATA den pasado ya caba a duna su aporte na operacion di e museonan aki, y aworaki despues di e pandemia finalmente a yega na un acuerdo, y asina aki facilita e operacion di e cuater museonan aki.
“Ta hopi importante pa nos, pa nos trece nos historia, cultura, nos herencia dilanti pa nos comunidad y, tambe sigur, pa nos bishitantenan. Pues, esaki ta un ehemplo di con nos ta duna realze na esaki banda di multiple otro ehemplonan cu mi por menciona, cu ATA ta haci, pa asina duna aporte na nos cultura. Mi por menciona nos carnaval, Dia di Brasil cu tur e celebracion rond di dje, tambe nos celebracionnan nacional, incluyendo Dia di Betico, Dia di Himno y Bandera, Dia di Rey, Festival di Dande, tambe nos ta duna support na e Bon Bini Festival, semanalmente, y sin lubida Aruba Air Fair, di cual su di seis edicion ta wordo conmemora e aña aki na September.
Esaki ta otro paso di con ATA ta prioritiza proyectonan cu tin di haber cu nos cultura y historia”, Ronella Croes, CEO di ATA a subraya y a señala cu asina ATA ta inverti fondonan di turismo, den turismo mes y den nos comunidad.
E acuerdo cu Fundacion Museo Arubano pa dos aña, permitiendo asina tambe e Fundacion, pa asina tuma e pasonan necesario, a base di un Plan di Accion, cu ATA a aproba, pa asina e museonan bin bek riba pia principalmente despues di e pandemia.
