Gasolin a subi cu 15,3 cent
ORANJESTAD (AAN): E atake di Rusia riba Ucrania a causa un aumento drastico di prijs di gasolin rond mundo. Esaki ta bin debi cu prijs di bari di crudo a pasa $100 pa prome biaha e aña aki. Riba Diamars esaki a hasta sobrepasa e nivel di $130 pa bari.
Prijs di gasolin ta subiendo barbaramente na Merca, na Europa, na islanan den Caribe, pues tambe na Aruba.
Awe Diaranson 9 di Maart 2022, prijs di gasolin na Aruba a subi cu 15,3 cent pa liter. Ya for di Dialuna caba por a mira rijnan largo di automobilista para na Gasoline Station pa yena tanki di vehiculo.
Esaki nifica cu chauffeurnan na Aruba tin di bira conciente, cu ora bo core cu bo auto awor y den futuro, e lo bay costabo mucho mas. Esnan cu ta bay pa cumpra auto, tin di tene cuenta cu esey y pone prioridad pa cumpra vehiculo cu ta usa menos combustible.
Pero awor ta un bon momento pa planea bo strategianan di traha mihor ruta, y con bo ta drive bo auto pa asina bo spaar lo mas gasolin posible y reduci e peso riba bo cartera.
Kico mas bo por haci den situacion asina? Ata aki 5 TIP pa yudabo spaar gasolin pa lunanan venidero.
(1) Minimaliza coremento: Si bo por retraza respondi of otro actividanan, bo por preserva e gasolin cu bo a cumpra y reduci consumo total pa e isla, yudando den cierto forma chikito, pa reduci e cantidad di combustible cu tin di importa.
(2) Obedece velocidad maximo: Ora cu bo ta core, obedece e limitenan di velocidad, y core mas suave. Bo habito di maneha auto lo bay hunga un rol significante den spaarmento di gasolin. Varios test a demostra, cu si bo reduci bo core menos duro, e cantidad di gasolin cu e motor ta consumi, ta hopi menos.
(3) Maneha na forma balanza: Evita di primi trot pa aumenta velocidad rapidamente, of trata di brake di golpi, lo mas hopi posible. Testnan a haci a demostra cu frecuente aceleracion of primi brake, ta pone bo vehiculo gasta mucho mas gasolin. Si bo brake cada rato innecesariamente, ta ponebo gasta gasolin por nada. Tin hende na Aruba cu ta primi brake pa delaster un cos. Hasta si nan mira un pida papel chikito ta bula riba acera, ya nan ta brake. Tambe tin hende cu ta maneha auto cu “dos pia”, esta un pia riba trot y e otro riba brake. Tur esaki ta incorecto y ta ponebo gasta gasolin pornada, y ta trece trafico na peligro tambe.
(4) Check pa aspecto aerodinamico: Desmantela cualkier reki cu lo bo por tin riba dak di bo vehiculo, ora cu eseynan no ta wordo usa. Ora bo ta core duro, mas di 50 porciento di poder di motor ta wordo gasta djis pa sobrepasa e resistencia aerodinamico crea pa esaki. Si bo ta core cu bicicleta colga na reki, sea patras of riba bo dak, tur esaki ta ponebo gasta mas gasolin cu normal. Check tambe presion di bo wielnan! Cada wiel semper ta ‘perde’ un promedio di 1 psi pa luna. Un wiel cu menos presion den dje, ta ponebo gasta mas gasolin tambe, y pa colmo ta pone e tire gasta mas rapido tame.
(5) Evita di usa airco: Usando airco ta pone un auto gasta mas gasolin. E motor tin di bay aporta na mas capacidad pa asina por pone e compressor draai, y esaki ta pone e motor bay revv mas halto, incluyendo den ‘idle’. Pa awor, usa e airco solamente ora e ta absolutamente necesario.
