Parlamentario Sonaly Fernandez Acosta di AVP
ORANJESTAD (AAN): Como miembro nobo di parlamento di Aruba Señora Sonaly Fernandez Acosta kier pone enfasis riba e realidad cu e futuro di nos isla ta depende di dje y crea un base mucho mas fuerte y solido; bon maneho social, enseñansa di calidad y un comunidad saludabel y activo. E 3 pilarnan aki ta fundamental y mester complementa otro y no funciona separa.
Punto 1. Maneho social ta cuminsa cu oportunidad igual pa tur hende: Tur ciudadano merece oportunidad pa desaroya su potencial a base di su capacidad y talentonan. Nos mester duna apoyo na grupo vulnerabel, fortalese famia y elimina exclucion social. Bon maneho social no ta solamente pa yuda hende sobrevivi, sino tambe yudanan bira fuerte y independiente pa por funciona como parti di nos sociedad, sintiendo nan mes balora y exitoso.
Punto 2. Enseñansa ta e motor di progreso: Educacion ta habri porta y crea oportunidad y por asta kibra circulo di pobreza. Esaki no ta solamente pa mucha of hoben, sino tambe pa adulto sea cu of sin empleo. Educacion mester ta disponibel pa tur edad- for di desaroyo trempan te cu formacion tecnico y profesional. Crea oportunidad pa combina empleo cu enseñanza, ta e receta pa crecemento profesional. Un comunidad bon prepara ta base pa un Aruba fuerte.
Punto 3. Deporte e fundeshi di disciplina: Deporte no ta solamente pa move e curpa fisicamente, e ta siña disciplina, teamwork y resilencia. Deporte ta uni, yuda cu salud mental y fisico y crea un comunidad mas positivamente activo. Deporte ta habri portanan di mundo pa desaroyo di nos siguiente generacion. Inverti den deporte ta inverti den futuro di nos comunidad
E sectornan aki mester conecta cu otro. Un mucha cu ta sinti sigur, come bon, haya apoyo na scol y por expresa su energia den deporte of arte tin hopi mas oportunidad pa desaroya den un adulto cu confianza y contribui na su comunidad. Pesey ta considera importante fortalece e relacion entre e 3 pilarnan. Un Aruba inclusivo ta cuminsa cu cuido humano, enseñansa pa tur hende, acceso na deporte y oportunidad igual como vehiculo pa alcansa union y exito.
Parlamentario Señora Sonaly Fernandez Acosta ta para pa e tres pilarnan menciona y di su banda ta compromete su mes di trece nan mas cerca di otro pa un bienestar sano di nos ciudadanonan.
