ORANJESTAD (AAN): Riba Diahuebs, e asina yama Asociacion di Empleadonan cu un contrato individual di W.E.B. Aruba N.V. (VWI) a tuma nota di e rueda di prensa di Formador cu Stakeholders,
riba Diaranson 28 di juli 2021, unda Ing. Richard Eman, director interino di Utilities Aruba N.V., a duna un relato.
Tambe VWI a tuma nota di un cantidad di acusacionnan contra e dos directornan di WEB cu a sali publica den e matutino Diario y tambe den Solo di Pueblo.
Ora prensa a puntra Sr. Eman kico ta e motibonan pa ta considerando pa kita e directornan di WEB for di trabao, Sr. Eman no kier a bay den detayes.
Esaki ta unda cu VWI a reacciona: “E berdad ta cu Sr. Eman no por bay den detayes pasobra, te cu VWI ta na haltura, no tin motibonan real pa kita e directornan for di trabao. Tambe a sali publica den prensa cu e directornan di WEB lo ta tranca e proceso di negociacion cu e empresa proveedor di gas natural liquido (LNG), esta EAGLE LNG. E acusacion aki tampoco ta cuadra cu e realidad.”
VWI ta bisa cu nan ta representa mas cu 75 porciento di e staff di WEB y nos miembronan ta cerca y conoci cu kico ta e berdad di loke ta pasando cu e asunto di LNG y cu e asunto di RECIP.
E declaracion di Sr. Eman, bisando den e rueda di prensa, cu ta WEB mes a para su proceso pa adkiri LNG tampoco ta cuadra cu berdad. E acusacionnan vil y baho den medianan di prensa contra e dos directornan di WEB no solamente ta atacha e bon reputacion di e directornan, pero tambe ta atacha e reputacion di tur nos miembronan y trahadornan general di WEB Aruba NV.
“VWI ta condena categoricamente e campaña publico sushi y baho aki contra
di e dos directornan y contra WEB en general. No ta keda VWI nada otro di conclui cu aki tin forsanan siniestro ehecutando un agenda personal of politico cual ta encera e terminacion di e dos directornan pa por realisa nan propio agenda.”
Directiva General di VWI a bisa cu nan lo sigui monitor e desaroyonan aki di cerca y si ta necesario nan lo responde den e forma adecuado.
No ta conoci di con VWI mes di su banda no a pidi un reunion cu Formador pa papia riba e asunto ey. Pasobra ta hopi asociacion, organizacion, y instancia a pidi reunion cu Formador.
