ORANJESTAD (AAN): Durante e Conseho di Ministronan cu a tuma luga na San Nicolas siman pasa, San Nicolas Business Association (SNBA) tambe tabata presente pa duna nan punto di bista di desaroyonan den San Nicolas.
Presidente di San Nicolas Business Association, Andres Hernandez a remarca cu esaki ta e di tres biaha cu ta hayando e Conseho di Ministronan pariba.
“Esaki ta un indicacion cu realmente tin un interes di e Gobierno pa yega na algun proyecto cu por cambia e status cu tin aworaki na San Nicolas”, señor Andres Hernandez a expresa.
Pa locual ta tur e presentacionnan di parti di inversionistanan na San Nicolas na Conseho di Ministronan, señor Hernandez a bisa cu nan a bay bon. Importante pa menciona ta cu tur e presentacionnan tabata encera proyectonan di personanan cu ya caba tin e capital pa cuminsa, personanan cu ta cla pa cuminsa di biaha cu e trabao.
“Awor lo wak con por pone hunto pa loke ta e parti di burocracia worde laga atras, flexibilisa red-tape untiki pa e inversionistanan aki por cuminsa mas pronto cu ta posibel cu realisacion di nan poryectonan pariba di brug. Den ultimo tempo tin hopi critica y mal contento den comunidad, sinembargo loke falta ta hendenan cu ta papia di solucion, mientrastanto tin inversionistanan cla pa cuminsa ehecuta. No ta bisa cu esaki ta e solucion general, pero poco poco por yega na algo”, señor Hernnandez a expresa.
En general, señor Hernnandez a duna di conoce, SNBA ta honra y contento cu tur Minister di Aruba tabata presente y a ricibi e presentacionnan. Tur e proyectonan presenta ta realisabel y cla pa cuminsa. Pronto si esaki bay den un porcentahe basta halto lo tin un efecto grandi na San Nicolas cu pueblo lo sinti y lo ta orguyoso di dje.
Prome Minister Evelyn Wever-Croes ta gradici SNBA y cada inversionista cu a participa na e Conseho Minister na San nicolas. Hunto lo trece desaroyo pa San Nicolas cu lo benificia San Nicolas y Aruba henter. Aruba tin potencial, San Nicolas tin potencial
