Minister Ursell Arends ta satisfecho con Aruparking ta bayendo
ORANJESTAD (AAN): Segun Minister Ursell Arends, despues di e reintroduccion di Aruparking ta bay crea un poco disgusto, mal contento cerca algun di e ciudadanonan. Pero poco poco ta wak cu e stapnan cu a wordo priminti ta wordo hiba.
El a indica cu na prome instante tabata tin problema cu algun di e mashinnan cu tabata cobra den dollar na lugar di florin. Tur esaki a wordo coregi. E siman aki a habri cu stickernan pa loke ta trata e personanan cu limitacion fisico, adultonan mayor y hende muher na estado cu mester wordo reparti.
Poco poco ta wak cu e maneho ta wordo implementa manera a wordo palabra. E meta di trece regulacion tambe ta wordo logra mirando cu hopi di e hendenan cu ta bishita Bestuurskantoor ya yega y ta bisa cu nan a haya un lugar pa parkeer, a indica.
Segun e mandatario, tur esaki ta mustra cu ta bayendo den bon direccion, pero evaluacion ta keda importante pa asina scucha di tur hende con e pasonan ta bayendo y si mester ahusta, gobierno lo ta habri pa ahusta den dialogo cu raad.
El a bisa cu e ta satisfecho con e ta bayendo. E 'feedback' cu a haya di Aruparking mes tambe ta mustra cu e ta bayendo den bon direccion y e ta spera tambe cu pueblo poco poco lo por cuminsa sostene Aruparking.
A enfatisa cu Aruparking no tey pa parti boet pa loco ni pa genera entrada riba custia di pueblo pa paga pa e buraco financiero cu tin den Arubus. Aruparking tey pa trece regulacion den parkeer den centro di ciudad y ta sostenibel. No ta pa gana placa. Ta djis pa su gastonan di operacion, e minister a splica.
