Segun señor Rino Hermans di CMO:
ORANJESTAD (AAN): Director di Crisis Management Office (CMO), señor Rino Hermans, a enfatisa recientemente den un entrevista cu Matutino DIARIO e importancia di e training nacional di evacuacion cu ta wordo organiza tur aña durante luna di maart, como parti di preparacion di Aruba pa un posible menaza di tsunami.
Segun Hermans, apesar di e esfuerso pa informa comunidad cu suficiente anticipacion, ainda tin un parti hopi ciudadano cu no ta consciente di e training of cu simplemente no ta participa. El a indica cu CMO ta anuncia e ehercicio cu tempo y ta organiza rueda di prensa pa informa pueblo tocante su importancia y manera di participa.
Hermans a señala cu e falta di participacion no ta limita solamente na ciudadanonan. Den pasado, CMO inclusive a traha un rapport pa Gobierno, despues cu a constata cu algun instancia gubernamental of gobierno mes tampoco a evacua durante e training. Segun e director, esaki ta un punto cu mester sigui haya atencion, considerando cu un ehercicio di evacuacion solamente por duna un imagen realistico di e preparacion di pais si tur sector participa activamente.
Un biaha pa aña, CMO ta organiza e training pa midi y evalua e efectividad di e plan nacional di evacuacion den caso di un posible tsunami. Durante e ehercicio di maart ultimo, segun Hermans, aproximadamente 32 mil persona a wordo evacua, incluyendo turista. E sector hotelero ya tin alrededor di siete aña participando activamente den e training.
Sinembargo, Hermans a expresa preocupacion cu participacion di e propio comunidad Arubiano ainda ta limita. El a menciona cu reaccionnan y comentarionan cu ta aparece riba medianan social ta indica cu tin necesidad pa sigui amplia e informacion y conscientisacion. Pa CMO, e meta no ta solamente pa informa, sino tambe pa educa, alerta y crea mas interes den comundad tocante nan propio rol durante un situacion di emergencia.
E director a reitera cu e training nacional di evacuacion ta tuma luga tur aña riba e di tres diahuebs di luna di maart. Participacion ta habri pa famianan, scolnan, luganan di trabao y organizacionnan.
Hermans a enfatisa cu preparacion pa un calamidad no por keda solamente responsabilidad di CMO of di Gobierno. E efectividad di cualkier plan di emergencia depende tambe di con pueblo ta reacciona. Participa den e training, por lo tanto, no ta simplemente un ehercicio anual, sino un oportunidad pa cada ciudadano conoce su ruta, practica su reaccion y contribui na un Aruba cu ta mas prepara pa enfrenta un emergencia real.
