ORANJESTAD (AAN): Durante su estadia na voco Den Haag, Prome Minister mr. Mike Eman a topa cu Raymond Bridgewater y Hiram Zievinger,
dos profesionalnan cu ta activo den sector di horeca na Hulanda y cu ta contribui diariamente na e experiencia di hospitalidad den Den Haag. Prome Minister a gradici nan personalmente pa nan dedicacion, profesionalismo y compromiso cu e sector di servicio. Como muestra di aprecio y conexion cu Aruba, el a entrega nan un pin di bandera di Aruba.
Hiram Zievinger, cu ta ocupa e funcion di F&B Manager na voco Hotel Den Haag, tin 35 aña di experiencia den horeca y recientemente a cuminsa un nobo etapa profesional na e hotel. Raymond Bridgewater tin 5 aña trahando den sector di horeca na Hulanda y ta forma parti di e grupo di profesionalnan cu diariamente ta representa balornan di trabao duro, hospitalidad y perseverancia.
Gabinete AVP-Futuro ta considera importante pa mantene contacto cu Arubianonan y amigo di Aruba den exterior, specialmente cu esnan cu ta aporta positivamente na diferente sector profesional y cu ta fortalece e conexion entre Aruba y Hulanda door di nan trabao y dedicacion. Encuentro manera esaki ta contribui na reforsa e sentimento di cercania y reconocimento p’e personanan cu, a pesar di ta biba y traha na exterior, ta sigui carga Aruba den nan curason.
