Despues di negociacionnan intenso
- Interes riba e fianza di Covid ta baha inmediatamente
- Pesey mesora tin 16 miyon Florin disponibel
ORANJESTAD (AAN): Diabierna mainta 24 di mei, Gobierno di Aruba a anuncia un logro hopi grandi y historico pa Aruba, cu beneficionan pa nos futuro generacionnan. Prome Minister Evelyn Wever-Croes, durante e conferencia di prensa a anuncia cu gobiernonan di Aruba y Hulanda a yega na un acuerdo, despues di negociacionnan hopi intenso.
Acuerdo legal hibrido: Gobierno di Aruba y Gobierno di Hulanda a yega na un acuerdo di un Rijkswet hibride manera Aruba a propone.
Den e Rijkswet aki ta regla e definicion di e normanan y den landsverordening, ley local (LAft) ta regla e normanan financiero, manera e ta awor den e LAft.
Contenido di e Rijkswet: Prome Minister a indica cu e rijkswet lo contene tambe, entre otro: Supervision financiero; Escalacion; Posibilidad pa PPP bou condicionnan estricto y; Areglo con ta sali di e rijkswet (exit bepaling).
E rijkswet mester worde entrega na e Parlamentonan prome cu 1 di mei 2025.
Beneficio pa Aruba: E acuerdo cu a worde firma diabierna mainta entre Aruba y Hulanda, ta contene varios beneficio financiero cu Aruba ta haya a cambio, entre otro:
(1) Interes abou riba fianza di Covid, awor mesora e ta baha di 6.9% pa 5.1%;
(2) Unabes e rijkswet ta cla, e interes ta baha na 3.4%;
(3) Ademas, pa prome biaha riba mesa, Hulanda lo por refinancia tambe e debe externo existente di pais Aruba, esaki ta e debe cu a worde redobla bou di e gobierno di AVP. Te cu awor Aruba ta pagando te na 7%, lo por baha te na 3.4% si Hulanda refinancia. Aruba a bin ta purba pa logra e acuerdo aki pa mas di 10 aña y awo Gobierno ta logra esaki cu ta un parti hopi importante di e acuerdo cu ta riba mesa;
(4) Lo cambia e normanan financiero pa haci nan mas flexibel, cu ta permiti Aruba haci e inversionnan necesario, entre otro un prison nobo, cu normalmente Aruba no por yega na financia esakinan debi cu nos normanan financiero ta hopi rigido. Y tambe pa crece socio economicamente. Pa esaki Gobierno di Aruba ya a acerca IMF caba y ta trahando riba e revision aki.
Prome Minister a remarca cu e acuerdo aki ta dentro di e mocionnan di Tweede Kamer na Hulanda cu pa Gobierno di Aruba ta menos relevante, pero specialmente, e ta dentro di e mocion cu Parlamento di Aruba a duna aña pasa cu ta urgi Gobierno pa sigui negocia teniendo cuenta cu algun aspecto.
Despues di firma e acuerdo aki: Conseho di Ministronan di Reino diabierna mainta a aproba e acuerdo aki y despues di a firma e acuerdo, e interes riba e fianza di Covid ta baha mesora di 6.9% pa 5.1%, cu esaki e aña aki mesora tin 16 miyon Florin cu ta bira disponibel pa reaslisa proyectonan.
Tambe lo trek in e ley di RAft y mesora y lo cuminsa traha riba e detayenan di e rijkswet pa presenta na nos parlamentonan no mas tarda 1 di mei 2025.
Despues cu e rijkswet worde acepta: Prome Minister a indica cu despues cu e rijkswet worde acepta pa nos Parlamento y pa Tweede Kamer, e interes riba Fianza di Covid ta baha na e nivel cu Hulanda ta paga na interes mas un opslag di 0.2% (esey lo ta awor 3.4%).
Tambe, unabes cu e Rijkswet ta cla, Hulanda ta dispuesto pa schrijf in y refinancia nos debe externo pa e baha pa e mesun interes di 3.4%.
Prome Minister Evelyn Wever-Croes aki a bisa: “Mi ta gradici esnan cu a asisti mi den e negociacion cu Hulanda, tambe e team Hulandes y Secretario di Estado van Huffelen y tambe coleganan minister di Gabinete Wever-Croes II pa e sosten y apoyo. Semper mi a bisa cu (1) nos ta keda na mesa pa negocia na forma serio, y (2) cu mi tin tur fe y confianza cu nos lo logra un bon deal pa Aruba. Awe nos a cumpli un biaha mas. Negociacionnan no tabata facil pero nos a keda firme, cu respet, y enfoca riba e interes general di henter nos comunidad. Awor caba nos lo scapa 16 miyon tur aña na interes, si nos logra un Rijkswet, e beneficio por ta mucho mas grandi”.
