E futuro mundial pa cual DIARIO a prepara Aruba a bira realidad
- Juni y Juli lo mira Europa y Venezuela na urna electoral
- Prome parti di eleccion na Merca ta uni presente y pasado
ORANJESTAD (AAN) For di Prome di Januari 2023 te na e momento cu mundo a dal su ultimo paso prome cu el a drenta 2024, DIARIO a cumpli cu su deber pa prepara Aruba pa 2024 y tur loke tabata spera Aruba no solamente a base di maneho gubernamental na Aruba y den Reino, pero tambe na tres pais, directamente di importancia mayor pa Aruba.
Pa Aruba, tres pais pafor di Reino Hulandes, ta sigur di interes crucial.
Historia ta entrega prueba di loke por drenta for di e pais tras di horizonte di Aruba, cu ta Venezuela cu ayera a anuncia fecha di eleccion presidencial, di cual DIARIO continuamente ta informa Pueblo di Aruba.
Despues cu instancianan oficial Venezolano a analisa mas cu binti fecha, e Gobierno di Nicolas Maduro a dicidi cu e fecha pa eleccion na Venezuela lo ta 28 di Juli.
Na e momento cu e noticia a alcansa DIARIO, ya informacionnan tabata drenta riba e eleccionnan cu lo tuma lugar na Union Europeo, cu manera tur informacion ta indica, lo encera un mandato directo na dirigentenan Europeo, pa atende problemanan di Europa na prome lugar.
Na e pais cu ta responsabel pa e exito grandi di industria turistico di Aruba y cu por wordo considera e base pa resultado positivo pa economia di Aruba, cu ta Merca, e prome parti di eleccion a conoce atencion mundial, ya cu e resultado por bolter Merca y hiba e pais rumbo pa un Merca pa Mericano na prome lugar!
Na e momento cu e prome parti di 2024 lo entrega mundo e base pa loke lo bira decisionnan pa futuro directo di mundo, ya manera ayera DIARIO a splica, e proximo Gobierno di Reino Hulandes, no ta conoci pa e Reino di cual Aruba ta forma parti.
DIARIO ta ripiti su ponencianan cu a dicidi pa mensahenan cu el a entrega te awor na Aruba, cu e hecho cu Aruba na e momentonan aki conoce un situacion stabil, ta haci cu Aruba por ta trankil mientras inseguridad grandi ta loke mundo y sigur e paisnan di cual Aruba ta depende, ta enfrenta.
Nicolas Maduro lo organisa eleccionnan na Venezuela segun su concepto di eleccion y esaki ta sigur motibo di preocupacion grandi mas ainda si tene na consideracion cu e legion di casi Mil Miyon Venezolano cu ta opone Maduro, no ta na Venezuela y no por participa na eleccion.
Esaki ta nifica un peligro grandi, pa loke realmente eleccion lo nifica pa Venezuela, caminda Nicolas Maduro a duna prueba cu e no tin miedo pa conkista teritorionan cu e ta pensa cu mester ta di Venezuela, sigur si nan por produci rikeza pa e Gobierno di Nicolas Maduro.
Kico eleccionnan pa Parlamento Europeo por produci pa Aruba? E realidad basico pa cual DIARIO a adverti ora tabata papia di eleccionnan na Hulanda y henter comunidad Europeo, cu a bira fuente di asistencia pa problemanan mundial cu a produci migracion y asistencia financiero pa tur pais den problema.
“Ta basta,”ta e mensahe di alanan derechista di e paisnan Europeo cu segun tur informacion tin oportunidad grandi di haya mas forsa den e eleccionnan pa Europa na 2024.
Votadornan ta sostene e pensamento importante cu e momento a yega pa Europa soluciona su problemanan y cuminsa cera porta pa migracion cu tur su resultadonan na prome lugar.
Hasta e pensamento cu Europa pa tur Europeo ta wordo rechaza dor di hopi votador cu kier mira loke nan pais ta produci bay pa e pais cu no por perde su identidad tampoco, manera ta pasa awor den seno di un Europa uni.
Kico lo pasa na Merca cu ta tene su eleccionnan primario?
Uno di e sistemanan electoral mas fascinante cu nos a conoce den nos bida, ta base di eleccionnan na Merca cu a cuminsa cu primarionan y caucus cu mester produci e candidatonan presencial di Merca.
“Merca pa e Pueblo di Merca,”ta hiba Mericanonan na e gran triunfo di Donald Trump, cu ayera durante “Super Tuesday”tabata en espera di e resultadonan di un cantidad “super”pues grandi di estadonan di Merca, riba e persona cu mester ta e representante di Partido Republicano na Merca.
Pa comprende e espirito den e proceso electoral na Merca, mester tuma nota di e eleccionnan mas “cayente”cu Aruba a conoce. Como invitado pa cera conoci cu e proceso electoral na tur parti di Merca, nos a keda sorprendi pa e animo di votadornan na e pais, cu ta crucial den economia di Aruba.
Manera DIARIO a adverti, 2024 ta hiba Aruba na e situacion pa cual eleccionnan na Merca, Venezuela y Europa lo dicidi den porta di e epoca di cambio mundial di cual 2024 a duna prueba di ta inicio!
