E temporada di tormentanan mas violento na mundo ta anuncia su mes --- *Manera por a spera prome ola tropical prome cu temporada a cuminsa --- *Rotonde, problema hospital, inflacion mundial y exigencia di emergencia
ORANJESTAD(AAN)—Cuanto placa Aruba mester pa por duna asistencia necesario di e pais wordo confronta cu un temporada pisa di horcan?
Cuanto reserva Aruba tin pa ernfrenta e situacion aki?
Mei a haci su entrada y manera por a spera na e otro parti di oceano Atlantico, e prome ola tropical a nace den vecindario di Africa, cu ta cuna di sistema tropical cu por alcansa e costanan di America del Norte y tambe region di Caribe.
Horcannan ta nace den vecindario di e equator, e parti mas calor di mundo den e temporada cu solo ta cuminsa biaha bay Noord, loke ta haci posibel pa e zona di mal tempo riba Venezuela, tambe alcansa Aruba.
Naturalesa tin su reglanan y e hecho cu hende a mishi cu reglanan di naturalesa solamente a haci cu awor nos ta den un situacion mucho mas serio enfrente peliger di desastre natural cu no ta den nos man y cu hende no por domina.
E temperatura di lama ta un aspecto sumamente importante den e desaroyonan di sistema tropical, produccion di tempo pisa cu por causa daño serio na hende y por destrui economia, situacion financiero y social di un pais.
Despues di Omicron, cu a wordo sigui pa e Guera na Ukraine cu a cambio e forma di bida di hende, yegada di e temporada di horcan mester haci nos realisa kico por pasa y con nos mester ta prepara.
E temperatura di lama den vecindario di Aruba, Curacao y Bonaire, ta uno di e motibonan cu sistemanan generalmente ta desvia y dicidi di bay mas Norte.
Tambe si tene na consideracion cu mundo ta rondo y no plat, ta topa cu otro motibo cu un sistema ta parce di ta bay mas halto, mientras e distancia corto cu continente tambe tin su efecto.
Cu cambio den temperatura di lama, por nota con varios sistema cu a pasa djis pa Noord di Aruba, no a hala bay Noord pero a keda riba lama pa alcansa America Central, drenta Golfo di Mexico y bolbe bandona Cariba siguiendo un ruto cu normalmente un horcan no ta sigui.
Awor kico Aruba ta haci?
Ora ta presenta informacion na Pueblo mester tene consideracion cu e sentimentonan di Pueblo.
Hende na Aruba, mescos cu na henter mundo ta cansa. Tabata pandemia. Despues a sigui problema di petroleo y despues menasa di guera mundial. Hende ta cansa di tende mal noticia y francamente bisa, nos tambe pero nos mester sigui traha y splica peligernan cu por presenta nan mes.
Pa cuminsa e parti mas importante di necesidad di hende, cu ta cuminda.
Na entrada di temporad di horcan, paisnan cu ta keda den e zonanan mas frecuenta pa horcan, ta crea un reserva di ingredientenan pa cuminda, remedi y otro productonan importante.
Famianan mester tin un reserva di cuminda pero tambe bateria, etc. si coriente cay afo.
Tin gasto envolvi den e preparacionnan pa e pais y pa hende na un momento, cu situacion financiero ta malo.
Mester warda awa pa bebe y awa pa haci limpi.
Aruba tn un reserva pa enfrenta e situacion aki? Nos ta papia aki di un situacion cu ta nifica cu un cantidad mas grandi di hende no por cumpra hopi cuminda pa warda. Un cantidad mas grandi di hende no tabata tin placa pa mantene cas manera mester tabata.
Parlamento tin un trabou sagrado y mester discuti e asunto aki.
Loke si nos ta pidi di antemano ta, pa no bay hunga wega politico. Ta tristo e storianan di politica rond Dia di Mama, cu a wordo uza dor di e mes grupo politico cu a destrui placa di Aruba, y cu awor a uza pobresa causa pa pandemia, inflacion, guera mundial, pa trata na haya voto.
Tabata un berguensa pa mira con a hunga cu necesidad di hende pa haya voto.
Awe mester prepara pa un epoca dificil, cu ta temporada di horcan cu no ta duna hende ningun indicacion kico por spera na cada pais.
Loke si ta bisa ta, cu ta wordo spera cu 19 tormenta lo haya nomber. Esaki ta seis mas cu un aña normal.
No por bisa con nan lo move. Loke si por bisa ta, cu nan desaroya mas facil, manera a keda demostra na 2021 tambe y ta resultado di cambio di clima.
DIARIO lo mantene Aruba informa!
