Programa FUTRX formando e futuro lidernan
ORANJESTAD (AAN): DIARIO a tene un entrevista cu Kim Geurtsen, Human Resources Manager na The Ritz Carlton Aruba a papia riba e tremendo proyecto educativo FUTRX mediante cual studiantenan di Colegio EPI y Universidad di Aruba lo adkiri mas conocimento y habilidadnan necesario for di e lidernan den e industria pa asina eherce e carera di Hospitalidad.
Geurtsen a laga sa cu aworaki nan ta bay cuminsa cu un grupo di 15 studiante cual lo wordo guia pa ta e lidernan den futuro.
Turismo ta e pilar mas grandi pa Aruba su economia. The Ritz Carlton a caba di habri dos propiedad na Turk & Caicos y Bermuda y a ripara cu conocimento riba turismo y servicio ta na un nivel diferente compara cu Aruba, a bisa.
"Aruba tin asina hopi aña den hospitality y den turismo y nos ta e role model pa hopi otro pais. Nos kier manera sigui y crea mas future leaders cu por bira e role model pa otro paisnan", e ehecutivo a splica.
Reuella Reeberg, HR Manager na Aruba Marriott, a agrega cu nan kier forma e futuro lidernan aki na Aruba y nan lidernan actualmente na Ritz Carlton y na Aruba Marriott tin asina hopi conocimento y tin asina hopi experiencia y nan no kier wanta esey djis pa nan. Nan kier comparti e conocimento aki cu comunidad di Aruba y e futuro generacion. Ta bay yega un punto cu nan tambe tin cu bay 'join' e forsa laboral y nan ta bay ta miho prepara.
Hopi studiante ainda no sa kico nan pasion ta y cu e programa aki por cende e 'spark' ey den nan pa nan por haya e pasion pa hospitalidad. "E ta un win-win", a expresa.
Reeberg a remarca cu en berdad nan ta sinti cu tin scarcedad di profesional den e tereno aki na Aruba. Ta wak cu hopi mas hende por ta nan tin un pensamento riba kico hospitalidad ta y nan ta scucha e palabra hotel. Pero hotel no ta solamente traha warda, traha weekend, casino, etc. Hospitalidad ta hopi mas cu esey, a enfatisa.
Finalmente, Jason Zeng, Senior Human Resources Coordinator na The Ritz Carlton Aruba, a bisa cu nan tur tabata studiante tambe y no ta facil ora di caba di studia pa haya un trabao. Esaki ta un oportunidad pa habri wowo di e studiantenan, di e futuro lidernan cu tin hopi posibilidad pa bay den e area di hospitalidad.
"FUTRX ta un tremendo programa. Esaki ta solamente e comienso y hopi cos mas lo bin ainda den e siguiente sesionnan despues di e biaha aki.
Zeng a bisa cu tur esnan cu ta interesa por keda pendiente riba e avance di e programa FUTRX, cual a inicia cu e prome grupo y e prome sesion diaranson ultimo.
