Parlamentario Tromp-Lee den su disertacion na IPKO Curaçao:
ORANJESTAD (AAN): Diamars 28 di februari parlamentario Shailiny Tromp-Lee tabata tin e oportunidad pa hiba un discurso cortico durante e reunion di IPKO. Parlamentario Tromp-Lee a habri su discurso riba e tema di COHO y RAft na unda Tromp-Lee a haci un peticion na tur presente pa ban bek na mesa di reunion, y yega na un areglo di RAft teniendo cuenta cu e mesun argumentonan pakico COHO no ta riba mesa mas awe.
Parlamentario Tromp-Lee a sigui su discurso riba e retonan cu Aruba ta confrontando na e momentonan aki. Na banda cu Aruba mester stimula e crecemento economico, tambe mester inverti den e ehecucion di landspakket y mester mik cada bes pa logra e normanan financiero, cu a keda stipula pre-COVID, cu Hulanda ta exigi aun despues di a pasa den un pandemia. Apesar di e reto grandinan aki Gobierno di Aruba a logra entrega e Presupuesto di Pais Aruba pa aña 2023 na tempo y a wordo aproba pa Parlamento di Aruba dia 14 november 2022 cu un surplus di Afl. 63 miyon, cu ta 1% di e BNP.
Tromp-Lee a bolbe enfatisa cu e pandemia a stroba Aruba di logra un finansas publico sostenibel y cu poco poco nos ta na caminda pa logra esaki atrobe. Pa por logra esaki tin algun solucion cu por trece alivio pa pais Aruba y un di esaki ta e interes di nos debenan actual. Aruba no a ricibi ningun tipo di saneamento (parcial) di debe y si nos por ricibi esaki lo bay yuda nos enormemente.
Un otro alivio riba nos situacion financiero ta si Hulanda refinancia nos debenen di pasado na un interes abou. Recientemente, Gobierno di Aruba a informa cu na comienso di maart lo cuminsa trata e tema di refinanciamento.
Parlamentario Tromp-Lee ta spera cu Hulanda ta habri pa duna Aruba saneamento (parcial) di debe of pa refinancia nos debe na un interes mas abou posibel y cu un areglo di pago mas largo cu ta posibel.
Parlamentario Tromp-Lee a finalisa cu apesar tin preocupacion grandi riba Aruba su situacion financiero actual, tin algun desaroyo positivo cu no por keda sin menciona. Un di esaki nan ta cu Aruba su turismo de aña 2022 a crece y surpasa aña 2019 cu tabata e aña mas miho di turismo pa Aruba. Aruba a cera cu un recuperacion di 98% na 2022 compara cu 2019 y ta proyecta cu e aña aki nos economia lo yega na e nivel pre-COVID.
\ Un otro desaroyo positivo na Aruba ta cu Gobierno ta trahando duro pa sigui diversifica nos economia riba e tereno di energia. Gobierno di Aruba tin plannan grandi pa haci e cambio pa hydrogen.
Varios otro reforma ta tumando y lo tuma lugar cu tambe lo yuda nos economia, entre otro reforma nan pa mehora entre otro e clima di empresa y di inversion na Aruba y reforma di nos sistema di impuesto. Tin varios otro plannan di reforma cu tambe tin prioridad pa Aruba y Gobierno ta compromenti pa ehecuta nan pero loke ta keda un desafio grandi ta e capacidad y recursonan limita.
Apesar di tur e retonan cu nos pais a enfrenta y ta enfrentando, nos por wak cu tin un maneho responsabel unda cu nos a sa di cumpli cu e exigencianan di Hulanda. Nos ta spera cu Hulanda por reconoce e maneho responsabel di parti di Gabinete Wever-Croes y por reconsidera e saneamento (parcial) di debe of un interes mas abou di nos debenan.
