Compania na Gran Bretaña cu analisis
ORANJESTAD (AAN): Recientemente un compania estableci na Gran Bretaña cu tin servicio na mas di 10.000 punto rond mundo pa yuda pasaheronan warda nan maleta y demas ekipahe, esta Bounce Inc., ademas di ta ofrece e servicio aki di warda maleta, nan ta haci investigacion y ofrece nan opinion riba e mihor lugarnan pa bay disfruta di vacacion rond mundo.
Nan kier a haya sa ta cual ta e 10 mihor islanan di mundo cu viaheronan lo por disfruta di dje, usando diferente tipo di factor pa yega na conclusion y puesto. Esaki nan ta yama ‘The Island Index’.
Despues cu nan a pone un team haci un investigacion, a analisa di e islanan cual ta e lunanan mas calor, cual ta e temperatura promedio di e luna mas calor, cua luna tin mas awacero, y e promedio di awacero den e luna ey, cua luna tin e temperatura mas cayente di lama, e promedio di temperatura di lama e luna ey, e cantidad di beach cu nan tin, cosnan cu tin pa haci.
Tambe na ta check e promedio di prijs di Hotel, cuanto costa un bebida (cerbes domestico), y asina na final ta haya un ‘Island Score” di 1 te cu 10 punto.
Nan a caba di finalisa cu e estudio di 2024, y DIARIO a tuma nota cu e isla di Aruba a sali na e di 8 lugar di e destinacion di isla mas popular pa bay pasa vakantie na 2024.
Aruba su temperatura di mas calor ta den luna di Mei, cu 29ºC. Mas awacero ta cay na Aruba den November, cu 90 mm di yobida. Lama ta mas cayente den luna di October, cu promedio di 30º C. Aruba tin 27 beach, y tin 743 actividad pa haci.
Na final Aruba a obtene un score di 7.24 cu a ubica nos na di 8 lugar den e Top 10. Esun cu a sali na prome lugar ta Phuket na Thailandia.
Solamente 3 isla den Caribe a logra sali riba e lista, pues ademas di Aruba tin tambe Puerto Rico na puesto #4, y isla di Cozumel (Mexico) na puesto #6. Esnan cu kier sa mas di e investigacion por check e website aki:
DIARIO a nota cu nan a pone e isla di Paxos (na Grecia) como e destinacion cu pasaheronan tin di evita, como cu el a obtene un score di solamente 0,34 for di 10 punto.
