Director di UNESCO Aruba Marck Oduber:
- Awor como reserva reconoci door di UNESCO
ORANJESTAD (AAN): Dia 3 di november venidero, Aruba lo celebra pa prome biaha e Dia Internacional di Reservanan di Biosfera como un reserva oficialmente reconoci door di UNESCO. Segun Marck Oduber, director di UNESCO Aruba, diferente proyecto relaciona cu e biosfera ta forma parti di e celebracion, cu ta pone enfasis riba e relacion entre conservacion di naturalesa, desaroyo sostenibel y bienestar di comunidad.
E reconocemento, otorga dia 5 di juni 2026, ta un logro di gran significado pa Aruba y pa Reino Hulandes. E reserva ta abarca henter e isla y su teritorio marino, destacando e conexion entre tera, lama y tur forma di bida cu ta depende di nan.
Oduber ta splica cu e concepto di biosfera ta referi na e conhunto di tur organismo bibo y nan interaccion cu otro y cu nan ambiente. Un reserva di biosfera ta promove un manera di biba den cua e ser humano y naturalesa por desaroya den harmonia. Esaki ta rekeri un balance entre proteccion di ecosistemanan, actividad economico y e necesidadnan di comunidad.
Naturalesa ta sostene diferente actividad cu ta contribui na economia y calidad di bida. Sin embargo, pa e beneficionan aki por continua, e ser humano mester asumi su responsabilidad pa cuida y proteha e recursonan natural. Segun Oduber, conservacion y desaroyo economico mester wordo considera hunto den e decisionnan cu ta determina futuro di Aruba.
E enfoke di un reserva di biosfera ta descansa riba tres funcion principal: conservacion, desaroyo sostenibel y apoyo na investigacion, educacion y monitoreo. E ultimo parti aki ta esencial pa compronde miho e relacion entre hende y naturalesa, evalua e impacto di actividadnan humano y orienta decisionnan a base di conocemento.
Oduber ta enfatisa cu e reconocemento internacional ta trece tanto oportunidad como responsabilidad. Aruba mester sigui desaroya y canalisa proyectonan cu ta contribui na e obhetivonan di e reserva. E progreso y funcionamento di reservanan di biosfera ta wordo evalua periodicamente, cu un revision formal cada diez aña.
Den e contexto di e discusionnan tocante crecemento turistico y construccion di hotelnan, Oduber ta señala e importancia di busca solucionnan cu ta mantene un balance entre economia y proteccion di naturalesa. Un economia sostenibel ta depende di un ambiente saludabel, y e bienestar di comunidad ta estrechamente conecta cu e condicion di su ecosistemanan.
Cu aña 2030 acercando y e debate internacional tocante futuro di e Obhetivonan di Desaroyo Sostenibel, Oduber ta subraya cu e atencion mester inclui tambe e otro formanan di bida cu ta comparti nos planeta. Ser humano ta parti di un sistema mas amplio, den cua animalnan, mata y otro organismonan tin un papel esencial pa mantene e balance ecologico.
E celebracion di 3 di november ta ofrece Aruba un oportunidad pa duna contenido concreto na su reconocemento como reserva di biosfera. E proyectonan relaciona cu e fecha ta pone e compromiso cu sostenibilidad den practica y ta destaca e responsabilidad comparti pa cuida e patrimonio natural di Aruba pa e generacionnan di awe y di futuro.
