Minister Geoffrey Wever
ORANJESTAD (AAN): Minister di Finansa, Asunto Economico y Sector Primario, mr. Geoffrey Wever, a anuncia cu e siman aki Aruba a paga un total di 90.1 miyon florin na Hulanda riba e Covid-lening. E prestamo cu Hulanda a pone disponibel durante e periodo critico di pandemia.
E pago ta consisti di 45.8 miyon florin na capital y 44.4 miyon florin na interes, y ta representa e di dos biaha cu Aruba a cumpli cu pago riba capital. Den total, Aruba a paga 91.6 miyon florin na capital, reduciendo asina e debe di 915.5 miyon florin pa algo menos cu 824 miyon florin.
“E pago di awe ta otro paso concreto den nos compromiso pa fortifica e confianza den maneho di finansa publico y pa demostra cu Aruba ta un pais cu ta cumpli cu su palabra y su obligacion,” Minister Geoffrey Wever a bisa.
Durante pandemia di Covid-19, entrada di sector publico y priva a cay drásticamente, y Hulanda a asisti Aruba cu liquides pa sigura cu nos economia por a sigui move. Entre 2020 y 2021, Hulanda a otorga nuebe prestamo, cu posteriormente a consolida den un solo prestamo di 915.5 miyon florin, conoci como e Covid-lening.
Na momento cu e debenan a wordo consolida, a termina e periodo liber di interes y a introduci un tasa di interes di 6.9% pa un periodo di 20 ana, cu por baha te 3%-4% den caso cu aproba un Rijkswet.
“E meta di nos gobierno ta cla: pa gradualmente baha e nivel di debe, cual lo baha e gasto di ineters, cu lo fortifica e stabilidad fiscal y crea un base solido pa crecemento economico sostenibel, unda cu lo tin un reparticion husto di e rikesa di nos país.
E pago di awe ta confirma e compromiso di Aruba den maneho responsable di finansa publico, un compromiso cu ta forma parti esencial di e Programa di Gobernacion AVP–Futuro 2025-2028, cu ta orienta riba estabilidad, crecimiento y bienestar di tur ciudadano.
