E mundo di credito cu ta sostene economia seriamente afecta
- Economia Aruba dependiente di Merca ta mara na Dollar
- Situacion financiero di Aruba ta depende di Hulanda y Euro
ORANJESTAD(AAN)- Temporada di vacacion a cuminsa y tanto na Hulanda, Aruba como Merca, hende ta trata na evita di realisa situacionnan unico y importante cu ta desaroya na mundo.
Uno di e desaroyonan grandi actualmente ta, e forma cu tanto Union Europeo como Merca ta uza aumento di e taza di interes cu ta mishi cu entre otro hipoteca, tarhetanan di credito, debenan y reglanan basico bancario desconoci pa mayoria di publico pero cu resultado pa publico y cu creacion di un situacion unico den Reino Hulandes.
Hulanda, cu a evita estado di bancarota di paisnan Hulandes den region di Caribe for di momento cu el a subi su bandera como Madre Patria, for di Prome di Januari 1999 como Miembro di Union Europeo ta participa den Euro.
Aruba dia Prome di Januari 1986 a introduci su Florin Arubano cu a wordo mara na Dollar Mericano mescos cu e Florin Antiano, cu a sobrevivi final di Antia. Awor ta traha pa reemplasa e Florin Antiano cu ta moneda di Curacao y Sint Maarten.
E islanan BES den Caribe ta parti di Hulanda pero no ta participa den Euro y tambe tin Dollar como nan moneda.
E situacion monetario di Reino ta bini dilanti den resultadonan cu e realidad tin pa Aruba, cu ta ricibi asistencia Hulandes cu Euro cu ta bira asina sosten pa e reserva di divisa (placa stranhero) pa Aruba cu ta di balor fundamental pa Florin.
Sosten financiero di Hulanda ta evita caida financiero total di Aruba y ta un infusion pa placa cu ta sostene e Florin Arubano.
Un moneda mester di un base solido financiero cu Euro por ehempel ta exigi di paisnan cu ta participa na Union Europeo y asina na Euro. Haltura di debe nacional por ehempel ta sumamente importante pa participacion den Euro.
E Guera di Ukraine directamente ta expone e realidad monetario den Reino cu no conoce un union di moneda y den cual pues e pais cu mas poder financiero ta mara na Euro y resto na Dollar.
Na e momentonan aki e desaroyonan cu Dollar y Euro ta duna prueba di e turbulencia mundial cu basha realidadnan existente abou y ta cria gran incertidumbre.
Prijsnan a bay halto mundialmente a base di e hecho cu tanto e pandemia di Omicron como e Guera di Ukraine a resulta den crisis severo ocasiona pa e subida di prijsnan cu a forma un circulo vicioso, pues un spiral sin fin.
Prijsnan ta subi. Salarionan ta subi. Prijsnan ta subi. Costonan ta subi. Entradanan mester subi.
Na cierto momento e Banco Central di Merca a aplica e medida mas severo cu ta aumento di taza di interes pa asina pone fin na credito.
Esaki a manda e balor di Dollar halto y a afecta e balor di Euro cu tur resultado economico cu esaki tabata tin pa paisnan di Union Europeo.
Europa a contesta y a subi su tazanan di interes pero a wordo sigui atrobe cu Merca cu otro aumento di e tarifanan.
Kico esaki ta nifica pa Reino Hulandes y kico e ta nifica pa comercio cu Merca, den cual credito cu ta wordo afecta pa aumento di su interes ta sumamente importante?
E turista ta paga cu credit cards. Poco biaha ainda ta mira placa efectivo pasa di un man pa otro.
Credito empresarial ta conoci y tabata base di crecemento di negoshinan durante sigur ultimo siglonan. Prijsnan lo wordo afecta.
Si normalmente politiconan ta busca aumento di compra na un pais, den e situacion mundial actual kier stop publico di gasta placa pa asina baha e prijsnan cu ta subi ora demanda ta mas halto cu produccion.
Awe Aruba ta entre Dollar y Euro. Mara na Dollar, Aruba ta beneficia di e resultadonan cu e medidanan Mericano tin pa su turismo y su compra di mercancia pa importacion for di Merca.
Dependiente di Euro pa asistencia Financiero y pa e relacion personal y comercial y hasta estudio den Reino, Aruba ta atende cu un Euro cu ta baha entrada di compania y hende cu ta depende di Euro.
Con e situacion lo bira finalmente? Depende di circumstancianan cu a crea e situacion mundial cu a crea un situacion historico den cual guera di petroleo a manifesta tur su poder na mundo, cu kier deshaci di petroleo.
