Rino Hermans di CMO:
*Frecuentemente tin yobidanan pasahero
ORANJESTAD (AAN): Dia 1 di juni a inicia e temporada di horcan y riba esaki Director di Crisis Management Office (CMO), Sr. Rino Hermans, a duna di conoce cu pa nan sorpresa ta hayando un tras di otro e efectonan di e 'tropical waves'.
El a agrega cu den e dianan aki tabatin e prome disturbio cu tabata pafo di Caribe. E motibo di esaki ta cu tin un presion halto oost di Caribe y tabatin stof di Sahara cu no ta laga nan desaroya.
Aruba ta hayando awacero di e 'tropical waves' cu ta keda colga na e parti zuid di Caribe. Ta riparando cu frecuentemente cu tin yobidanan pasahero, nan no ta torencial cu mester activa e sistema."Danki Dios cu ta asina te ainda, pero tin otro preocupacionnan".
Segun Hermans, CMO ta preocupa pasobra NOAA (National Oceanic and Atmospheric Administration) no ta haya subsidio di gobierno di Merca y e informacionnan ta bayendo un tiki mas slow cu normal. Pero ta uzando otro manera pa haya actualisacionnan pa por mantene pueblo di Aruba informa.
El a agrega cu Departamento Meteorologico ta activo, pero CMO ta haci e impacto di e risico y ta uza data di NOAA, cu tin e cientificonan cu ta hacie. Meteo ta sigui haci loke nan ta haci y ta duna pronosticonan cu tin disponibel a traves di nan sistemanan. Pero e parti cientifico CMO ta atende cu ne a traves di NOAA.
Rino Hermans a indica cu e ta spera cu asina cu juli ta drenta cu e sistemanan ta bay hala mas central di Caribe, pero tin un presion halto na Republica Dominicana, Puerto Rico cu ta wanta tur e sistemanan aki.
P'esey ta ripara cu e costa di Venezuela y Colombia ta hayando hopi mas humedad y mas hopi awacero di cual Aruba tambe ta hibando nan, pero esey ta door di e humedad y e sistema di presion halto cu ta laga e sistemanan bay ariba. Esaki combina cu stof di Sahara ta un combinacion perfecto pa Aruba haya un par di yobida, e director di CMO a declara.
