Luna di Concientisacion di Cancer na Boca di Matriz:
ORANJESTAD (AAN): Januari ta Luna di Concientizacion di Cancer na Boca di Matriz, cu dia 19 di Januari internacionalmente reconoci como e dia oficial di conscientizacion, mientras cu actividadnan ta sigui durante henter e luna. Durante e periodo aki, Aruba ta uni cu programanan di screening y henter Aruba ta pone atencion riba prevencion y deteccion tempran cu BOCA, e Programa di Screening di Cancer na Boca di Matriz, coordina pa Fundacion ABO.
Cancer na boca di matriz ta un di e formanan di cancer cu por wordo preveni y ta curabel ora e wordo detecta tempran. Screening hopi biaha ta identifica cambionan mas prome cu cancer desaroya, permitiendo continuacion y tratamento oportuno, salbando bida.
“Screening ta un acto preventivo, no un reaccion riba enfermedad,” segun Nanine Ponson, Directora di Fundacion ABO. “BOCA ta existi pa hende muhenan na Aruba por cuida nan salud prome cu sintomanan aparce. Deteccion tempran realmente ta haci e diferencia.”
Loke ta e programa: BOCA ta e programa organiza y structura di Aruba pa screening di cancer na boca di matriz, diseña pa guia hende muhenan pasa door di un proceso di screening claro, confiabel y preventivo.
Den resumen, e proceso ta funciona asina: (*) Hende Muhenan ta tuma un prome paso verificando si screening ta aplica pa nan. (*) Hende Muhenan eligibel ta wordo guia pa participa den un Pap test. (*) E test ta wordo haci cerca dokternan di cas y/of verpleegkundige specialisa na un localidad apunta. (*) Resultado ta wordo comunica y siguientemente ta wordo coordina ora esaki ta necesario.
Mayoria di hende muhe cu participa den screening ta haya resultado normal. Ora abnormalidad wordo detecta tempran, tratamento por cuminsa na un etapa unda cancer na boca di matriz mayoria biaha ta completamente curabel.
E Rol di Fundacion ABO: E fundacion ta coordina programanan nacional di screening di cancer na boca di matriz basa riba poblacion di Aruba. Su rol ta: (*) Organiza y maneha programanan di screening. (*) Proporciona informacion y guia claro. (*) Sostene deteccion tempran pa reduci enfermedad avansa y tratamentonan intensivo. (*) Traha den colaboracion cu proveedor nan di salud, sin reemplasa cuido medico.
Programanan di screening ta diseña pa e salud di poblacion, pa proteha e salud di nos futuro door di detecta posibel enfermedad tempran.
Aki ta haya sa con Hende Muhenan por tuma e prome paso: (*) Comparti e Luna di Conscientizacion di Cancer na Boca di Matriz, hende muhenan ta invita pa completa un cuestionario cortico di eligibilidad pa wak si screening di cancer na boca di matriz ta aplica pa nan.
E cuestionario ta disponibel via e website aki:
Of scan e QR code riba e poster di BOCA cu ta wordo distribui na henter nos isla, riba social media, y durante evenementonan di comunidad durante henter e luna di Januari. E ta lihe, simpel y diseña pa reduci inseguridad — no pa duna un diagnostico medico.
Hende muhenan cu tin pregunta of cu ta prefera tuma contacto directo cu BOCA, por haci esaki sin ningun compromiso via telefon of WhatsApp pa ricibi guia.
Un Esfuerso Global, Un Yamada Local pa Accion: Luna di Conscientisacion di Cancer na Boca di Matriz ta wordo reconoci mundialmente, cu programanan di screening na hopi pais cu ta uza e luna di Januari pa motiva prevencion, educacion y participacion. Campaña di BOCA na Aruba ta alinea cu e esfuerso global, mientras cu e ta pone enfoke riba e comunidad local.
E mensahe ta claro: Cuida bo curpa ta inclui screening preventivo, hasta ora bo ta sinti bon. Lo bay papia di esakinan dianan venidero via entrevistanan na Cool FM, na X-FM, Magic FM, Power FM, Radio Bo Guia, y Telearuba.
Alcance den Comunidad & Visibilidad na lugarnan clave riba nos isla, e.o. tur Boticanan BENU, na ImSan, na Hospital Dr. Horacio Oduber, y na Botica di Servicio.
Na e lugarnan aki y tur e materialnan ta dirigi e hende muhenan pa acerca BOCA pa mas informacion y pa e siguiente pasonan. No ta duna conseho medico na sitio.
Un Mensahe pa e hende Muhenan: Screening di cancer na boca di matriz ta salba bida. E ta preventivo, efectivo, y ora detecta tempran, cancer na boca di matriz mayoria biaha ta curabel. Haci screening parti di bo auto-cuido ta un inversion den e salud di bo futuro.
