Hulanda a duna OK
ORANJESTAD (AAN): Den reunion di Conseho di Ministronan di Reino riba Diabierna 25 di Februari, Aruba su peticion pa sosten di likidez a worde aproba, 12 miyon Florin pa e prome kwartaal di 2022. Aruba ta den cumplimento cu tur e condicionnan.
Inicialmente Aruba a haci un peticion pa un suma mas halto. Sinembargo, na comienso di aña nos tabata tin placa ainda riba cuenta di pais Aruba, y Caft a conclui cu nos no mester di full e suma. E placa cu tabata tin na comienso di aña riba cuenta di pais Aruba, tabata debi na atrasonan den pago di luna di december, y no tabata placa destina pa januari. A trata na splica Caft pero sin resultado.
Gobierno di Aruba ta hopi satisfecho cu e suma aki, cu ta yuda den pago di e cuentanan pa e prome kwartaal pa 2022.
Tranche kwartaal 2, 2022:
Awor ta cuminsa e trabaonan pa peticion di sosten di likides pa e di dos kwartaal. Den reunion di Conseho di Ministronan di Reino awe mainta, ya caba a anticipa cu pa e di dos kwartaal Hulanda kier conseho di Caft riba algun otro punto, por ehempel:
(*) Cuanto di e placa di Loonsubsidie cu a worde paga di mas, a worde cobra bek; aki na Aruba companianan a cobra 124 miyon Florin di mas, parti a worde paga caba, pero ainda falta pa cobra 113 miyon Florin.
(*) Status di presupuesto 2022, na Aruba esaki a worde entrega a Parlamento e siman aki, y ta worde spera cu prome cu e siguiente peticion di sosten di likides, esaki lo worde trata den Parlamento.
(*) Recortenan structural den gastonan di AZV, pues aki lo midi con efectivo AZV tabata y lo ta den e recortenan.
(*) Con Aruba ta avansando den ehecucion di e Landspakket; pa cu esaki no ta premira problema, mirando cu Aruba ta den cumplimento cu e condicionnan.
Probablemente lo pone un, mas of tur e puntonan aki como condicion pa e siguiente tranche di sosten di likides. E siguiente tranche ta sumamente importante pasobra den e tranche ey tin e placa cu Gobierno ta presta pa por paga e mita vakantie uitkering na empleadonan publico. Gobierno di Aruba ta bay traha riba esaki diligentemente y ta conta riba sosten y cooperacion di comunidad den esaki.
Pabien Aruba, cu e sosten di likides aki. Awor nos por sigui traha na recuperacion di nos pais.
