El a asumi un posicion central den un situacion politico sumamente dificil - Orden di Ley a prevalece den culminacion di e proceso democratico di eleccion
ORANJESTAD (AAN) —Uno di e retonan mas grandi cu sin duda personanan cu a ocupa e puesto di Gobernador di Aruba mester a enfrenta, tabata e eleccion 2021 na Aruba cu a wordo influencia pa diferente factornan desconoci den historia di Aruba.
Aruba a bay urna electoral den un di e etapanan mas dificil di Aruba, cu tabata refleha tambe den e cantidad di partidonan cu a participa y den e situacion sumamente hostil cu a presenta di diferente angulo.
Con e fase cu mester a bira realisacion di e decision di Pueblo na urna electoral lo a transcuri, tabata e pregunta grandi di Pueblo di Aruba.
Ya e proceso electoral y e guia oficial di e proceso a wordo somete na gran peliger dor di tur clase di informacion sin base cu tabata afecta e credibilidad di e funcionamento electoral di e pais.
Ta costumber, cu e lider di e partido ganador ta bira informador y despues, si e por cumpli cu e trabou, formador pa un Gobierno nobo.
E Gobernador di Aruba, representa di Rey y Gobierno di Reino Hulandes, ta encarga cu e proceso pa nombra un informador y formador cu mester atende cu tur partido politico y otro gremionan pa percura pa e pais haya un gobernacion cu por atende cu tur necesidad basico di e pais.
Cu e ganador di eleccion 2021 Evelyn Wever-Croes, lider di partido MEP lo no tabata tin un trabou facil, tabata un hecho conoci. Tabata reina temor den tur sector na Aruba, cu mescos cu a pasa na caminda pa eleccion y hasta despues di eleccion, e proceso lo wordo tranca.
Un alivio grandi a wordo entrega na Pueblo di Aruba, cu nombramento di dos persona cu no ta mara na mundo politico como informador pa yega na un Gobierno.
Gobernador Alfonso Boekhoudt a sobresali den su decision cu a resulta cu e proceso di informacion a bay na un forma rapido mientras Aruba tabata yega cerca di e dia cu e constelacion di Parlamento lo a cambia.
Ta hustamente cambio di e constelacion di Parlamento, tabata uno di e topiconan historico den mundo politico di Aruba, caminda e gran mayoria tabata opone presencia di Benny Sevinger den Parlamento di Aruba.
Por considera Benny Sevinger como un peon politico di su partido cu a nenga di baha Benny Sevinger for di su lista di candidato y a haci cu pa prome bez den historia di Aruba, un persona tabata encarcela ora el a wordo eligi como representante di Pueblo.
Na momento cu Aruba tabata enfrenta un situacion di tension politico, cu a wordo considera peligroso pa e seguridad nacional, tabata Gobernador Alfonso Boekhoudt cu a presenta e realidad di e Orden di Ley cu ta indica cu un persona no por huramenta y bira miembro di Parlamento si e ta den prizon y no por haci su trabou.
E funcion di Gobernador a resalta e siman aki, cu e proceso di formacion di Gobierno cu a progresa y a haci cu Aruba por prepara pa yama bonbini na un Conseho nobo di Ministro cu mester duna continuacion na e gobernacion ehecutivo di e pais.
E siman aki no por cera sin presentacion di e desaroyonan cu riba nan mes ta presenta un analisis di e forma cu Gobernador Alfonso Boekhoudt a duna contenido na su responsabilidad.
E conclusion di e analisis ta di acuerdo cu e aplauso di e gran mayoria di Aruba pa e trabou cu a wordo realisa dor di Gobernador Boekhoudt.
