ORANJESTAD (AAN): Den cuadro di 160 aña di conmemoracion di abolicion di sclavitud den Reino y conscientisacion di e historia di sclavitud na Aruba,
Ministerio di Cultura ta presentando varios programa pa brinda comunidad di Aruba informacion riba e historia di sclavitud di Pais Aruba. Sclavitud na Aruba ta un parti di historia di nos Pais cu no ta mucho conoci, pero cu ta importante pa nos conoce pa asina nos por compronde nos presente y pa evita pa ripiti den presente y futuro.
Historia di Sclavitud na Aruba: E prome programa ‘Historia di sclavitud na Aruba’ a worde produci na augustus 2022 y a cubri varios aspecto di sclavitud, di arte, investigacion scientifico, balor di archivo, experiencia personal y conseho profesional. Durante e prome programa aki a presenta, entre otro, historiado y skirbido di varios buki sr. Luc Alofs y sr. Edric Croes, hefe di departamento di cuido y maneho di archivo na Archivo Nacional Aruba ANA.
Sclavitud, parti di herencia di Aruba: Na juni 2023 a presenta e programa ‘Sclavitud, parti di herencia di Aruba’ den cual e historiado dr. Adi Martis a haci un recorido door di e epocanan di historia di Aruba y a comparti su conocemento a base di su investigacion tocante e periodo di sclavitud na Aruba.
A presenta dos programa tocante ‘Papiamento: herencia cultural di sclavitud’ na juli 2023 den cual sr. Ramon Todd Dandaré, linguista y traductor y e neerlandica, papiamentista y sociolinguista dr. Joyce Pereira a brinda informacion tocante di e origen y desaroyo di Papiamento, e efecto y resultado di colonisacion riba nos comunidad y e beneficio di Papiamento como idioma di instruccion den nos enseñansa.
Digitalisacion y Sclavitud: Conservacion di nos historia atraves di nos archivonan digitalisa ta masha importante pa futuro generacion di nos Pais. Biblioteca Nacional hunto cu ANA y otro partnernan ta haciendo un tremendo trabao pa digitalisa nos archivonan. Den e programa ‘Digitalisacion y Sclavitud,’ sr. Peter Scholing, investigado na Biblioteca Nacional Aruba hunto cu sr. Edric Croes di ANA ta brinda informacion tocante e importancia di digitalisacion den cuadro di preservacion di specialmente e archivonan di e tempo di sclavitud na Aruba. E programa aki a worde transmiti caba dia 31 di juli y 1 di augustus.
Un otro programa interesante cu Ministerio di Cultura a produci ta e ‘Historia di migracion di catibo na Aruba’ den cual sr. Edric Croes di ANA ta conta un storia cu el a compila for di archivonan cu ta cubri varios apecto di tempo di sclavitud na Aruba en general y di e fam Leest en particular. E programa aki ta worde transmiti dia 21 y 22 augustus.
Programa ta worde pasa na television y ta riba YouTube: Minister Xiomara ta gradici e expertonan na ANA y tambe cada un colaborado cu a duna nan tempo y a comparti nan conocemento pa asina por a produci e programanan informativo aki. E programanan ta worde transmiti na Telearuba y Diario TV y ta disponibel riba e canal di YouTube di Minister Xiomara Maduro.
