ORANJESTAD (AAN): Na final di reunion den Parlamento pa trata e tema di Presupuesto 2021, Prome Minister Evelyn Wever-Croes a pidi pa Parlamento sostene e presupuesto aki, mirando cu situacion na Aruba ta dificil.
E situacion financiero ta hopi critico y tin hopi preocupacion riba e reto cu Aruba tin su dilanti, y pesey ta necesario pa e presupuesto wordo aproba. Segun e mandatario, actualmente tin 3.800 persona cu a perde nan trabao desde comienso di e pandemia y ta nan responsabilidad pa yuda mantene nan atraves di FASE y esaki por tuma lugar solamente cu aprobacion di e presupuesto.
Por lo menos 8.800 persona cu nan trabao ta core peliger y nan ta depende completamente di subsidio di salario. E mandatario a enfatiza cu e empleadonan aki ainda no ta hayando 100 porciento di salario. Hopi hende ta bibando riba 60 porciento di nan salario ainda y nan ta logra sobrevivi cu ayudo di e subsidio. Un total di 12.600 hende cu ta cay bao di responsabilidad di Gobierno, cu no tabata asina prome cu e pandemia. Esaki ta nifica cu ainda Aruba ta den crisis.
Prome Minister a enfatiza cu entre 6 pa 8 mil persona cu no tin cuminda pa come tur dia y ta depende di pakete di cuminda, y Gobierno lo tuma esaki over.
Aruba ta recuperando y ta den bon caminda. Pa luna di Augustus ta spera un aumento di cantidad di turista. Y si sigui cu e tendencia aki, lo cera fin di aña cu un recuperacion di 76 porciento, Prome Minister a finaliza.
