E realidad estatal di e isla Aruba den un situacion historico mundial
- Un isla dilanti e desaroyo explosivo na e continente Sud Americano
- Mundo liber ta topa cu comunismo den porta di Aruba den Caribe
ORANJESTAD (AAN) Durante Segundo Guera Mundial, podernan grandi a enfrenta otro. Ta na e momento aki den Reino Hulandes, pasado a haya un nificacion enorme cu sigur a worde bon interpreta cu e palabranan di Princesa Juliana.
E prome miembro di Realeza Hulandes, a expresa e importancia di e momento cu e por a cana atrobe ariba teritorio Hulandes.
E importancia di Aruba como teritorio Hulandes hopi biaha no ta bini dilanti, aunke e ta entrega historia e motibo di tanto lucha cu a worde hiba door di podernan grandi pa conkista islanan chikito.
Aruba pa medio di Reino Hulandes a bira un isla mara na Europa na e otro banda di Oceano Atlantico, loke a marca su desaroyo y historia, pero sigur a duna stabilidad na e isla dilanto e continente Americano, cu un rumbo indefini.
E continente Americano ta consisti di tres parti, cu ta entrega e testimonio di e forma cu accion humano ta stroba loke mundo a entrega.
Ora papia awe di Merca, e abreviacion di America, ta papia di un pais cu a desaroya ariba tereno estatal, diferente for di resto di America, di un colonia pa un poder mundial.
Ora papia di Merca awe, ta papia di un sistema estatal, cu a bira posibel ora un colonia Ingles, flankea pa dos Oceano , a uni den un forma estatal unico.
Ta e formula estatal pa cual Merca a dicidi den su historia, a duna como resultado cu el a crea un poder, cu e continente Europeo, e continente di e colonizador, a tuma como e ehempel pa yega na un union estatal.
Estados Uni di Merca ta manifesta e forza di union, sin kita for di e diferente partinan di e pais, e posibilidad pa como estado sigui traha ariba asuntonan cu nan realidad natural ta haci diferente na cada parti di Merca.
Estados Uni di Merca a bira un forza mundial na e parti Norte di America cu Canada cu a yega na otro formula pa gobernacion, a base di mantencion di lazonan cu e conkistador cu den e caso aki ta Inglatera den Commonwealth.
Na Merca, e sistema democratico a bira e punto di salida pa gobernacion y liderazgo di e pais na tur nivel y na mes momento a produci e forza necesario pa un gobierno nacional poderoso.
Na America Central y Sud America, ta mira un desaroyo cu a stroba paisnan conoce un desaroyo manera Norte America a conoce.
E falta di un bon base legal como estado, a habri porta pa paisnan chikito, cu no a sabi di haci uzo hasta di oportunidadnan enorme cu nan posicion a entrega nan.
E sistema di gobernacion a dicidi pa historianan hasta sangriente na e estadonan Latino Americano, cu potencial enorme, cu no a worde uza debidamente.]
Dividi for di resto paisnan Latino Americano pa creaccion di e Gran Colombia den nan historia, por mira com posibilidadnan enonomico tremendo a worde mata na America Latino, pa revolucionnan sangriente y falta di structuranan gubernamental firme hancra den Ley.
Aruba, como teritorio Hulandes, goberna a base di Estado di Ley, por a conoce progreso mientras su poblacion a haya e oportunidad pa desaroyo como hende pero tambe desaroyo ariba tereno economico den un sistema politico di autonomia, cu mundialmente ta worde aclama como uno di e mihor formulanan, pa gobernacion.
DIARIO durante ultimo añanan a prepara Aruba pa desaroyonan mundial importante, cu conflictonan internacional, cu a culmina den porta di Aruba cu uno di e problemanan mundial mas importante.
Migracion ta e caminda pa solucion cu mundialmente a worde uza den historia door di e ser humano y cu a worde uza sigur cerca e Venezolano, ora politica di ultimo añanan a destrio e potencial cu naturaleza a duna Venezuela pa percura bon pa e Venezolanonan.
Mientras democracia a perde e guera na Venezuela cu entrada di socialismo, pa Aruba un momento serio a yega cu un problema mundial den su porta di cas.
Awe un America del Sur, pa falta di Union cu ta e formula constitucional cu a permiti e desaroyo di America del Norte, ta entrega Aruba e exigencia pa un bon defensa di su bienestar ariba tur tereno.
E posicion geo politico y regional di Aruba a bira un reto pa e pais Hulandes directamente dilanti costa di e gigante Venezuela, cu confrontacion directo cu Europa y Merca, den cual e realidad di Aruba ta hancra.
Aruba como parti di e Reino Hulandes y asina cu lazo directo cu Europa ta enfrenta un situacion sumamente dificil den porta di e pais Venezuela, cu atrobe ta entrega prueba di e vulnerabilidad di un pais, cu no ta hancra cu firmesa den e base democratico.
Kico realmente ta futuro di Venezuela, cu forzosamente ta worde dirigi pa Nicolas Maduro den un panorama mundial den cual mundo liber y comunismo ta den conflicto directo?
Un realidad cu sigur Aruba mester tene na cuenta na un mundo cu a pronostica cu guera ta parti di futuro directo, manera DIARIO continuamente a informa.
Dos forza cu ta representa America ta topa otro. E forza di democracia, hancra den e legislacion Americano, y e forza di dictadura cu pa deshaci di derecho humano mester uza forzanan peligroso cu a stroba America Central y Sud America di alcansa e logronan cu Merca a alcansa cu su sistema democratico!
