ORANJESTAD (AAN): Siman nobo a habri y Aruba One Happy Island Lions Club ta anuncia cu e preparacionnan pa nan proyectonan di servicio pa luna di December ta andando.
Durante e luna di fiesta, e club lo sigui sirbi comunidad cu un serie di iniciativa dedica na bienestar social, apoyo familiar y motivacion pa un estilo di bida saludabel.
Esaki ta e proyectonan cu e organizacion social tin planea pa henter luna di December 2025.
(1) Un sonrisa pa nos muchanan: Esaki ta un celebracion di Pasco dedica na yiu di famianan cu tin recursonan limita, cu regalo, wega, entretenimiento y un ambiente di alegria.
(2) Tayo riba Mesa edicion X-Mas: Un programa pa yuda combati hamber y yuda famianan cu ta pasa den situacion dificil, cu macuto di cuminda y cuminda cayente durante e luna di December. Dianan 6, 7, 13 y 14 di december bo lo por entrega bo donacion di comestibel, cuminda seco, productonan personal, higienico, regalo pa mucha na Centro Kibrahacha na Piedra Plat durante 10 or di mainta pa 1 or di merdia.
(3) Caminata pa bo Salud y Bienestar: Dia 17 di december 2025, cuminsando pa 5’or di atardi di atardi nan lo organiza un caminata familiar pa promove Salud y Bienestar riba Linear Park, participacion ta 5 Florin y na final bo lo ricibi un bunita medaya y fruta. Por inscribi via WhatsApp 568-0829 y asina reserva bo luga. E caminata aki ta pa promove Salud y Bienestar, pero tambe bo por scoge un causa cu bo ta desea di cana pe, por ehempel concientizacion di Cancer, Diabetese, Medio Ambiente, Hubentud, Vision (bista), Salud Mental, Ayudo Humanitario, Mitiga Hamber. Bo mes por scoge bo causa y pone esaki segun bo creatividad riba bo T-shirt.
(4) Ganadonan Concurso Pintamento pa Paz: E entrega di premio di e ganadonan di e Concurso di Pintamento pa Paz lo tuma luga den luna di December 2025. Aki ta reconoce e hobennan artista cu a expresa nan creatividad y mensahe di paz. Un total di 55 studiante di St. Paulus School a participa den e competencia aki.
(5) Benta di Rifa di Harley-Davidson: E benta di rifa ta sigui cu e oportunidad di gana un Harley-Davidson Fat Boy - 120th Anniversary Edition of 35 mil Florin cash como gran premio.
Bo por cumpra bo ticket tur diasabra y diadomingo na PriceSmart na Dakota, of tuma contacto cu cualkier miembro di Aruba One Happy Island Lions Club. Comerciantenan cu ta desea di contribui pa e bon causa aki por tuma contacto cu nos y nos lo yega te na boso porta di negoshi. E rifa aki ta danki na e iniciativa di Old Skool Bikers cu e programa ‘Helping the Helpers”.
Publico ta ser stimula pa sostene nan proyectonan di December. Bo tambe por sostene e proyectonan door di haci un donacion na Aruba Bank – Fundacion One Happy Island Lions Club, Account: 6005880190, anotacion: OHIL Servicio. Si bo ta desea mas informacion bo por contact via WhatsApp na 568-0829 pa mas informacion.
