Eduard Pieters, lider di PPA:
- Hopi cla bisa den reunion cu CMO
ORANJESTAD (AAN) Señor Eduard Pieters, lider di Partido PPA, den entrevista cu DIARIO a elabora riba e reunion cu CMO, cu tabata hopi informativo, cu a tuma lugar den Parlamento.
“Un reunion unda a duna nos bon informacion como miembronan di Parlamento, e ta un reunion cu nos a pidi for di basta tempo caba, sinembargo, door di agenda di Parlamento mes, el a tuma lugar te awo.”
Loke a bin hopi cla padilanti ta, cu Aruba no por keda mas den un fase di ‘ora nos tin problema, e ora nos ta core solucione’. Nos mester traha mas planifica, nos mester traha mas riba prioridadnan, anto si nos wak cu desde 2018 gobierno a cuminza duna mas prioridad na traha plan pa Aruba por bira un tiki mas resiliente, pa Aruba por wanta cualkier shock cu por tin, sea geopolitico of desasternan di naturaleza, of di cualkier otro indole”, Pieters a señala.
E lider di PPA, a agrega cu nan a trece hopi plan p’adilanti cu nos mester sigui traha riba dje, cu e gobierno actual mester sigui pone fondo disponible; por ehempel, ami ta unico miembro di Parlamento cu por puntra tocante e fondo di crisis, pasobra ta papia di fondonan di inversion, pero mester di un crisis funds.
“No mester bay warda te ora tin un calamidad, pa pa nos cuminza pone e fondonan aki disponibel, pa ora e situacion yega na nos porta, pa nos bay atak’e debidamente”, Parlamentario Eduard Pieters a subraya.
El a agrega cu el a scucha hopi hende bisa cu CMO no tin derecho di existencia, locual ta hopi lamentable, pasobra e ta duna di conoce cu tin falta di informacion, conocemento di kico ta pasando mundialmente, y con vulnerable, nos como pais ta.
